Shillong, Rymphang 06 : U Myntri Rangbah ka Jylla Conrad K Sangma ula pynbna ban pynlait ia ka CM scholarship sha palat 1 lak ngut ki samla pule hapoh ka 6 tarik Lber, kaba dei ka sngi dap phra snem jong ka Sorkar Meghalaya Democratic Alliance (MDA).
“Ha ka jingshisha, ha ka 6 tarik Lber, ka Sorkar MDA kan dap 8 snem ha ka Sorkar bad ka dei ka khyllipmat kaba kmen ia ngi namar phra snem ki paidbah ka Jylla kila ai ia ka lad ba ngin shakri ia ki” ong u Conrad haba jubab ia ka jingiatai halor ka mang tyngka ha Iingdorbar Thaw Ain ha ka sngi Balang.
“Kumta, ban lehkmen ia kane ka sngi lane ka jingpyndep 8 snem ha ka jingshakri ia ka Jylla bad ia ki paidbah ka Jylla, kum shibynta jong ka prokram jong ngi, ngin sa pynlait ia ka CM Scholarship sha palat shilak ngut ki samla pule ha ka 6 tarik Lber” ula bynrap.
U Conrad ula pynpaw ruh ia ka jingpyrshang jong ka Sorkar ban kyrshan ia ki samla pule, khamtam ha ki thain Nongkyndong, da kaba ai ia ki guidebook ba kin pynbha ia ki mark ne pass percentage ha ka eksam Secondary School Leaving Certificate (SSLC).
“Ha klas 10, haba ki khynnah ki iakhun ia ka eksam matric, lada ki khynnah ki pheil, ka jingim kine ki khynnah ka kut noh hashuwa ba kan sdang bad ka jingphohsniew baroh ka kut noh. Kum ka Sorkar lada phim leh eiei halor kane bad shah ia ka rukom treikam ba kan bteng bad ki khynnah kaba phi iakren ki don kumba 20,000 ngut ki bym pass ia ka klas X, ka jingim jong ki kan pulom noh. Namar kata, ka dei ka kamram jongngi ban kyrshan bad peit. Kane kam dei ka eksam IAS ne MCS. Ki don ia ka hok ba kin lah ban jam shakhmat ha ka jingim bad da kane ka jingsngew, ngi la wanrah ia ki guidebook. Ki don ki guidebook ha baroh kawei ka ri. Man ki klas X jong ki board bapher bapher ne CBSE ha ki Jylla bapher bapher ki don ia ki guidebook” ula ong.
“Ki khynnah pule jong ngi ha Nongkyndong kim ioh satia ia kum kane ka jingkyrshan bad kumta ngi la wanrah ia ki guidebook. Nga ai khublei ia u Myntri ka Tnad Pule Puthi bad ka Tnad ba kala shimkhia ia kane. Ka dei ka jingkyrkhu kaba khraw kaba ngi ai sha ki Khynnah” ong u Conrad.
.){kind=link}