Shillong, Rymphang 19 : U MP ka Lok Sabha na Shillong Dr Ricky AJ Syngkon, ula khlad kyndit hynne ka sngi Palei ha Dr H Gordon Robert Hospital, Jaiaw, hadien ka jingkem pang kynsan kynsan ha ka por ialehkai phutbol.
Kat kum ka khubor ba ioh, la iathuh ba u Dr Ricky ula leit ialehkai phutbol bad la ki jong ki paralok hynne ka janmiet ha ka madan ialehkai football, kaba don ha Mawlai Mawiong.
Lah iathuh ba u Dr Ricky ula kyllon ha ka por ba ialehkai bad mar mar, ki paralok kila pynkit noh ia u sha Mawiong Community Health Centre (CHC) ban ioh jingsumar, hynrei namar ka jingbym don doktor, la pynkynriah noh mar mar sha Dr H Gordon Robert Hospital.
Lah iathuh ba tang hadien katto katne por ki bor hospital kila pynbna ba u Dr Ricky ula khlad noh na kane ka pyrthei ha ka por 8:42 baje mynmiet.
U Symbud Myntri Rangbah Bah Prestone Tynsong bad ki Nongialam bad MLA ka VPP kila iapoi lut khrui sha kane ka hospital.
Lah ban kdew hangne, u Dr Ricky ula jop ia ka elekshon MP kum u kyrtong ka VPP da kaba pynliem ia u MP ka Congress Bah Vincent H Pala haduh 3.7 lak vote ha u snem 2024.
