Wanrah ka Sorkar ia ka kaiphod ka Expert Committee ha Iingdorbar
Shillong, Rymphang 18 : Ka Expert Committee on State Reservation Policy kala ai jingmut ban pynneh beit kumjuh ia ka State Reservation Policy 1972 kumba ka long, haba kdew ba bun ki kynhun kila ai jingkyrshan ia kane nalor ka jingma ba kan shah ktah ha ka jingbishar ka Iingkashari lada pynkylla.
Ka kaiphod bala wanrah da u Myntri Rangbah ka Jylla Conrad K Sangma ha ka sngi Balang ka ong “Bun na ki Kynhun ba don bynta, kila kyrshan ban pynneh kumjuh ia ka Reservation Policy 1972 kumba ka long. Ka Committee kala ai jingmut ban pynneh ia ka 1972 Reservation Policy kumba ka long. Kiba bun ki kynhun ki kyrshan ia kane bad kano kano ka jing pynkylla ka lah ban shah ktah ha ka jingbishar ki Iingkashari”.
“Ka Committee kam shem ruh ia ki daw kiba pynbor ban pynkylla ia ka policy ha kane ka khep. Shibun kiei kiei la lah ban ioh lyngba kane ka policy bad ki dang don ruh shibun kiei kiei kiba donkam ban ioh. Ka jingpyntreikam bha bad jingbud thikna kan ai ia u soh uba kham bha. Ia ka policy la pynbha na ka por sha ka por ban lah pynbiang ia ki jingdawa ka por bad ka jingdonkam jong ki paidbah ba bun balang” kala bynrap.
Ka kaiphod ka ong “Ka Committee ka ithuh ia ka 1972 Resolution kum ka Reservation Policy, kaba la don mynta la palat 50 snem. Kano kano ka jingpyrshang ban pynkylla ne pynwan dur thymmai ia kane ka policy ka lah ban ngat ha ka jingshah bishar jong ka Iingkashari hapoh ka Indra Sawhney Judgement. Kumta, ka Committee ka ai jingmut ban phikir bha ha kaban wanrah ia kino kino ki jingkylla ha kane ka policy, namar ka lah ktah ia ka jingshong ain jong ka. Ym don satia ki policy kiba biang lut nadong hadong, bad ka long kaba donkam ban pynbha na ka por sha ka por ia kaba la leh ha kane ka kam ba mynta”.
“Ia kine ki jingai jingmut la ai halor ki kyndon ain, ki jingai jingmut u paidbah, bad ki hukum jong ki Iingkashari khnang ban pynthikna ba ka Reservation Policy kan bteng ban shakri kat kum ka jingthmu jong ka ha kaban kyntiew ia ki jaidbynriew ba dang sahdien katba dang sah hapoh u pud u sam jong ka Riti Synshar bad ki kyndon Iingbishar. Ki jingai jingmut jong ka Committee ki thmu eh ban pynneh ia ka nongrim jong ka Riti Synshar ban leh ia ki kam kiba ai jingmyntoi, leh eiei halor ka jingsahdien ha ka imlang sahlang bad ka ioh ka kot bad ban pynthikna ba ka rukom ai bhah kan iai bteng ban shakri ia ki jingdonkam jong ki Jaidbynriew kiba duk tam ha ka Jylla” kala ong.
Ka Committee kala ai jingmut ban pynneh ia ka status quo, kyrshan ia ka jingpyntreikam pyrrkhing ia ka Reservation roster system, kaba la pyntreikam kat kum ka Office Memorandum 2022.
“Ka roster ka dei ban treikam manla u snem kat kum ka jingdon ki kam kiba lait. Kane ka system ka pynthikna ia ka jing pyntreikam bha ia ka bhah ba la mang bad ia ka kam ba lait yn pyndap kat kum ki nongrim bala pruid dak ha ka mukotduma u RK Sabarwal” ong ka kaiphod.
Ka Expert Committee kala ai jingmut ruh ban pynneh ia ka “Carry Forward” system, kynthup ka jingpynjlan na ka shisnem sha ka laisnem kat kum ka Resolution 1972.
Ka Committee kala ban jur ruh ba ka jingai bhah ka dei ban buh hakhmat eh ia kito kiba mad ia ki jingshah iuhroit haki snem kiba la leit bad kiba sahdien ha ka imlang sahlang bad ka ioh ka kot ban ia kaba khein na ka jingdon paid, bad ong “Wat ki jaidbynriew kiba kham rit paid ki lah ban ioh kham bun ha ka bhah bad kiba heh paid kim lah ban ioh ia kajuh. Ka jingpyrkhat ba nyngkong eh ka dei ka jingsahdien, ka jingshah leh bym hok ha ki snem ba la leit bad ka jingduna ki briew kiba don ha ka jingshakri”.
Ka Committee kala kyntait ruh ban ai bhah sha ki riewngeit jong ki niam bar it paid, da kaba pynpaw ba kane kan long kaba bei-riti. “Kumta, ka jingai jingmut ban ai bhah sha ki riewngeit jong ki niam ba rit paid ka dei ka bym lah ban pdiang kat kum ki kyndon ain ba mynta”.
Ka Committee ka ong ba ka mat ban ai bhah lang sha ki jaka pule, kaba hap hapoh ka Article 15(4), ka hap shabar ka jingkhmih ka Committee bad ai jingmut ba “Ka Sorkar Jylla ka lah ban shong pyrkhat dalade halor kane ka mat”.
Ka Committee kala ai jingmut ruh ban buh la ka jong ka kyrdan ia ki Economically Weaker Section (EWS) na ka Scheduled Caste (SC), Scheduled Tribe (ST) bad Other Backward Classes (OBC).
Nalor kane, ka Committee ka sngew ba kam iahap satia ban ai bhah ba kham heh ia ki riewlum trai muluk ha ki kam Class C bad D, haba kdew ia ka jingkrih shnong na ki jaka nongkyndong sha ki jaka sor.
