Shillong Rymphang 18: Ka District Magistrate ka East Khasi Hills Kong RM Kurbah, kala pynjari ia ka kyndon 163 BNSS ba mana tyngeh ba bret ia ki niut ne pyntuid ia ki jaboh sha ki wahduid kiba don ha shi lynter jong ka Mawlai Bypass.
Kane ka jingpynjari kala mih hadien ka jingioh jingtip ba ka don ka jingbret pathar ia ki niut bad ia ki jaboh sha ki jaka kiba long riat bad sha ki wahduid kiba don ha shi lynter jong ka Mawlai Bypass, kaba buh ha ka jingma ia ka koit ka khiah bad ia ka jingneh jingsah jong ka mariang.
La maham ruh, ba lada lap iano iano kiba pynkhein ia katei ka hukum kin shah pynshitom katkum ka kyndon 163 jong ka BNSS bad kiwei pat ki kyndon ain kiba lah ban pyntreikam.
Namar ka jingdonkam kyrkieh, kane ka hukum kan treikam noh mardor tad haduh ban da pynmih da kawei pat ka hukum.
