Assam | Shong bishar ka ECI ia ka jingpynkhrek elekshon | Kwah ki Party ban thep vote tang 2 phase

Guwahati, Rymphang 18: Ki seng sain pyrthei jong ka Assam ha ka jingiakynduh bad ki heh ka Election Commission of India (ECI), ki la kyntu ban pynlong ia ka elekshon sha ka iing dorbar thawain ka jylla ka ban sa wan ym ban palat ia ka ar kylla.

Ka ECI hapoh ka jingialam u Chief Election Commissioner u Gyanesh Kumar, ka la bishar bniah ïa ka jingpynkhreh jong ka Assam ban pynlong ia ka elekshon ha Guwahati ha ka sngi Ba-ar.Kane ka panel ka la pynlong ia ki jingialang bad ki kynhun jong ka BJP, Congress bad kiwei kiwei ki seng sain pyrthei.

Napdeng kiwei pat ki seng saiñ pyrthei ki long ka All India United Democratic Front, ka Asom Gana Parishad, ka Bodoland People’s Front, ka United People’s Party Liberal, ka Communist Party of India-Marxist (CPI-M), bad ka Aam Aadmi Party. Kine ki seng ki kyrshan khlem da pynkylla ia ka jingpyniaid ia ka elekshon, kaba la khmih lynti haduh u bnai Iaiong, ha kawei ka bynta ne ar bynta.

U Kumar u la pynlong ïa kane ka jingïalang bishar bniah bad ki heh pulit bad ki ophisar ka tnad elekshon ka Jylla, ba kynthup ïa u Chief Electoral Officer u Anurag Goel, ha ka jingïadonlang u Election Commissioners u Sukhbir Singh Sandhu bad u Vivek Joshi.

Ki la ai jingmut ruh ia ki sienjam ban pynthikna ia ka jingpyniaid ia ka jingthep vote ka ban iaid beit iaid ryntih. Ka kynhun jong ka ECI kiba la wan poi ha ka sngi Nyngkong (16 tarik u Rymphang, 2026) la khmih lynti ba kan bishar bniah ia ka SIR jong ki kyrteng nongthep vote.

Ka Assam unit jong ka CPI (M) ka la kyntu ia ka ECI ban pynthikna ia ka thup nongthep vote kaba khlem jingbakla.