Shillong, Rymphang 18 : U Myntri Rangbah ka Jylla Conrad K Sangma ha ka sngi Balang ula kular ba ia ka jingtyrwa ban phiah noh ia ka Shillong Agglomerate na East Khasi Hills kum ka District ba pura (Shillong District), yn sa shong bishar halor ki phra tylli ki nongrim treikam ha ka synshar khadar, kum shibynta jong ka jingpyrshang ban pynbeit ryntih ia ka synshar khadar ki jaka sor.
Haba jubab ia ka mat iatai ( short-duration motion) ba lyngkot bala wanrah da u MLA ka UDP Bah Paul Lyngdoh, u Conrad ula ong “….ban pynbna ia ka thain kum ka District lane Sub-Division, ki don ki kyndon kiba hap ban iapyrkhat : ka jingheh ka jaka, ka jingdon nongshongshnong, ka jingjngai naka Headquarter ba don lypa, ki jingduna ka jingshakri ha ka pule dangle bad ka koit ka khiah, ka jingsahdien ha ka ioh ka kot, ka jingsuk u paidbah, ki lad pyniasoh bad ka jingdon ka pisa”.
Ula bynrap ba kino kino ki jingtyrwa ki hap leit shuwa sha ka Committee kaba khlieh da u Chief Secretary, kaba don lang ki dkhot na ka tnad kam Pohiing, Planning, Finance, Community & Rural Development, Personnel, Divisional Commissioners bad kiwei kiwei ki Tnad.
“Kumta, haba iadei bad ka jingtyrwa ban phiah noh ia ka Shillong Agglomerate na East Khasi Hills District bad ban pynlong noh ia ka sha ka Districtba pura, ka Sorkar kan hap ban shong bishar bniah bha ia kane ka kam khnang ba kan lah ban shim ia ka rai kaba dei na ka bynta ka synshar khadar kaba kham bha bad ka jingsynshar ba iajan bad u paidbah” kular u Conrad.
U Myntri Rangbah ula ai khublei ia u Bah Paul “ba u wanrah ia kane ka mat iatai kaba kongsan” bad ong ba ka Master Plan kala pyni ia ka jingroi ka Shillong kala iaid palat ia u pud ka Municipal sha u pud ki census town bad ki shnong ki thaw.
Ka jingkhein antad ia ki nongshongshnong kan kiew na ka 3,54,759 ha u 2011 sha ka 4,47,221 hapoh u 2041, kaba pyni ia ka jingdonkam ban pyniar ia ka plan.
“Ym kum kiwei ki sor….ka Shillong ka don ia ki bor synshar kiba kham pher” ong u Conrad haba kdew ia ka bynta jong ka KHADC, ki Syiem, Dorbar Shnong bad kiwei kiwei ki Agency ka Sorkar.
“Ka long kaba donkam ban pyniadei ia ki kam jong ki bor treikam bapher bapher khnang ba kan don ka jingpynroi kaba da plan bad ba treikam bha” ula ong.
, yn sa shong bishar halor ki phra tylli ki nongrim treikam ha ka synshar khadar, kum shibynta jong ka jingpyrshang ban pynbeit ryntih ia ka synshar khadar ki jaka sor.){kind=link}