Shillong Rymphang 14: Palat 200 ngut ki nongshong shnong ka Daistong, East Jaintia Hills, kila phah da ka jingthoh sha u Myntri Rangbahduh ka ri u Narendra Modi bad sha u Myntri Kam Pohiing ka ri u Amit Shah ban phah pynsangeh ia ka Public Hearing halor ka jingthmu ban seng ia ka karkhana dewbilat jong ka Shree Cement Ltd.
U Bah Reachingson Siangshai u nongtrei mon sngewbha, haba kren na ka bynta ki nongshong shnong hynne ka sngi saitjain ula ong, ba ia ka Public Hearing ha ka 19 tarik u Nohprah 2025 lah dei ban pynsangeh namar ba ka Dorbar Shnong kala ai ia ka no-objection certificate (NOC) bad soi ia ka jingiatehkular bad ka kompani, khlem ka jingtip jong ki nongshong shnong.
Ula ong, ba ia kitei ki kot ki sla ym shim la pyni sha ki nongshong shnong.
“Ka jingiateh kular kadei kaba ki paitbah nongshong shnong kim don jingtip eiei” ula ong.
Kane ka kynhun kala maham ba kan ktah ia ka sawdong sawkun jong katei ka thain. Ka jaka kaba la thmu ban seng ia ka karkhana kadei hajan jong ka Lait Prah bad Krem Labit, kaba dei ka krem kaba jrong tam ha ka ri India bad ha ka dewbah South Asia, ha kaba ki dohkha phylla kiba matlah kidei kiba la lap na katei ka krem. “Lada ngi ailad ia ka karkhana pynmih dewbilat, baroh kitei kin sa shah pynjulor lut” ong u Bah Siangshai.
Sa kawei ka jingpyrshah kadei halor ka jaka puta, ula kynnoh ba katei ka jingthied jaka kala plie lad ia ka kynhun bym dei riewlum ban thied ia ka jaka riewlum da kaba pynkhein ia ka Meghalaya Land Transfer Act.
“Naduh mynno phi lah shah ia ki bym dei ki riewlum ban thied jaka na ki riewlum?” ula buh jingkylli ia ka sorkar bad ka dawa ba dei ban ai jingpynshai ia kano kano ka jingpynkylla ia katei ka ain.
Ki nongshong shnong kila ong, ba kila leit mih sha u Deputy Commissioner, ka Meghalaya State Pollution Control Board bad kiwei kiwei ki tnad sorkar shwa ban pynlong ia ka Hearing, hynrei ym shim la don kiban pynsngap ia ka jingkyrpad ka jongki.
Ha ka dorkhas kaba la phah ha ka 9 tarik u Rymphang sha u Modi, Shah bad kiwei kiwei ryngkat bad ka phah kopi sha u MP ka Shillong u Dr Ricky AJ Syngkon, ha kaba u Bah Siangshai ula leit ruh ban iakynduh mardor ia u Myntri ka Sorkar Pdeng uba khmih ia ka Tnad Forest ban kyrpad ban pynsangeh noh ia ki kam ki jam baroh.
Nalor kane, la phah ruh ia ka jingkyrpad sha u Nongialam ka Liang Pyrshah ka ïing dorbar thawaiñ ka jylla u Dr Mukul Sangma.
Ki nongshong shnong kila ujor ruh sha ka Meghalaya Human Rights Commission da kaba kynnoh “Ba kala don ka jingiai bteng ban pynkhein ia ki kyndon” ia ka hok longbriew manbriew kaba iadei bad ka Environmental Public Hearing kaba la pynlong ha ka shnong ha u Nohprah jong u snem ba la dep.
Kane ka jingujor kaba la mudui hapoh jong ka Protection of Human Rights Act, 1993, kala kyrpad ia ka Commission ban tuklar, kaba ki nongshong shnong kila shim ba kadei ka jingleh bym iahap ha ka Hearing kaba la pynlong ha ka 19 tarik u Nohprah 2025.
“Ngi ai ka jingshaniah kaba skhem bad ngi kyrpad da kaba sngewrit ba phin shimkhia ia kane ka kam bad ban leh ia kaba donkam na ka bynta ka bha ka miat jong ka hok, ka jinglong kordor jong ki briew bad ka jingsynshar ka ain” la pynpaw haka jingujor.
