Shillong, Rymphang 11 : Ka Drug Reduction, Elimination & Action Mission (DREAM) kala pynlong ia ka jingialang pynsngewthuh bad ki Village Defence Party (VDP) ka sor Shillong ban pynkhlain ia ki jingpyrshang ba lamkhmat da ki Shnong ha kaban tehlakam ia ka jingdih droks.
Ka jingialang ka pynleit jingmut ha ka jingpynsngewthuh ban nym ibein bad ban pynshlur ia ka jingiarap ia ki nongdih droks ha ki shnong ki thaw.
“Ka bynta jong ka VDP ka long kaba kongsan bha ha ban iarap lang ia ka jingpyrshang jong ki Pulit ka Jylla ban iakhun droks” ong u Mission Director Francis Kharshiing ha ka kyrwoh bala pynmih ha ka sngi Balang.
Ka jingialang kala iakren ruh ia ka jingdonkam ba kongsan ban buh ia ki Iing ba kyrpang ha ki shnong ki thaw kum ki jaka pynsah ia ki nongdih droks bala dep sumar khnang ba kin lait na ki jingiohpang.
“La pynsngewthuh ia ki VDP halor ka bynta ba kongsan jong ki ban iakren bad ki Dorbar Shnong bad ban iarap ia ka Shnong ba kan ai ia ka No Objection Certificate (NoC) na ka bynta ban buh ia kine ki iing ba kyrpang” ong u Bah Kharshiing haba bynrap “Nalor kane, ka jingkongsan ki vocational training (hikai treikam) ruh lah iakren kum ka sienjam ba kongsan ban plie ia ka lad kamai bad pynduna ia ka jingngop biang ha ki jingdih”.
Kiba la ai jingkren ha kane ka jingilaang ki kynthup ia u Inspector E Lamare, OC ka Madanrting Police Station bad u Inspector N Koch, OC ka ANTF Police Station.
Ki dkhot ka VDP kiba la wan iashimbynta ki kynthup na ka shnong Lawsohtun, Lumparing, Madanrynting, Demthring, Mawlai Iew-Rynghep, Lapalang, Nongthymmai, Mawlynrei Nongkrem, Mawlai Umjaiur, Umpling, Smit Pyllun, Nongrah, nalor kiwei kiwei.
 kala pynlong ia ka jingialang pynsngewthuh bad ki Village Defence Party (VDP) ka sor Shillong ban pynkhlain ia ki jingpyrshang ba lamkhmat da ki Shnong ha kaban tehlakam ia ka jingdih droks.){kind=link}