Shillong, Rymphang 10: U Symbud Myntri Rangbah ka Jylla Bah Sniawbhalang Dhar u la kyntu ban kiar na ki jingkdew kti halor ka jingbthei bomb dynamite ha par dewiong, da kaba ong ba ka jinglong jingman kaba mynta kam dei ka por ban shimkabu ban ioh nong haka sain pyrthei, bad u la pynthikna ba ka Sorkar kan nym map ban leh daka ba tyngeh ia kito kiba donkti ha ki kam tih dewiong beain.
Haba kren sha ki lad pathai khubor, u Symbud Myntri Rangbah u phah ia ka jingsngewlem sha ki longiing kiba la shah ktah ha ka jingbthei bomb dynamite kaba jia dang shen ha Mynsngat-Thangsko kaba la shim iaka jingim jong 28 ngut.
“Nga phah ia ka khubor jingsngewlem sha baroh ki longiing kiba shah ktah. Sngewbha kynmaw ba mynta kam dei ka por ban ialehkai politik” ong u Bah Sniawbhalang.
U Bah Sniawbhalang u la pynksan ia ka jingkitkhlieh lang, da kaba ong “Ka dei ka por ban shim ia ka jingkitkhlieh lang ha kum kane ka jingjia kaba sngewsih”.
U la pynthikna ba ka Sorkar ka la shimkhia da kaba phah ïa ki kynhun sha katei ka jaka bad ki heh Sorkar, kynthup ïa u DC bad SP, ki don ha katei ka jaka ban peit bad bishar ïa ka jinglong jingman ha katei ka jaka.
“Ngin ym pyllait ia uno uno u briew uba donkti” ong u Bah Sniawbhalang haba bynrap ba ka Sorkar kan leh daka ba tyngeh ia kito kiba donkti ha ki kam beain.
U Symbud Myntri Rangbah u la pdiang ia ki jingkynnoh pyrshah ia ka Sorkar MDA, da kaba ong “Ngi pyrshang katba lah ban tehlakam, ka Sorkar ka pyrshang pura ban tehlakam bad ban pynthikna ba kan ym don ka jingtih dewiong beain”.
Haba ia dei bad ka kyndon ba donkam jaka kaba heh 100 hectare ban tih dewiong katkum ka juk stad mynta (Scientific Mining), u Bah Sniawbhalang u la ïathuh ba u Myntri Rangbah ka Jylla u la iakren ia kane ka kam bad ka Sorkar Pdeng da kaba kyrpad ban pynduna ia ka kyndon jingheh jaka ban ailad ia ki trai jaka ba kin tih ioh dewiong katkum ka juk stad mynta (Scientific Mining).
“Ngi la ïoh ïa ka dorkhas na ki trai par dewiong kiba pynpaw ba ka jaka 100 hectare ka long kaba heh palat. U Myntri Rangbah ka Jylla ha kane ka shisnem ba la dep, u la rah iakren ïa kane ka mat bad ka Sorkar Pdeng da kaba kyrpad ïa ka jingdonkam ban pynduna ïa ka jingeh ka jaka khnang ba ki briew trai Jylla kin lah ban shimti ïa ka jingtih dewiong katkum ka juk stad mynta (Scientific Mining) ha kylleng ka Jylla. Kumta, kane ka kam ka dang don hapdeng ka jingïakren”.
U Bah Sniawbhalang u la pynksan baka Sorkar ka pyrshah iaki kam beain daka ba ong “Ka Sorkar kam kyrshan ia ki kam beain. Namar kine ki briew, kiba pynleit jingmut ha ki kam beain, ki briew ki la duh ei iala ka mynsiem”.
