Imphal, Rymphang 9: Ka seng kaikhlaw la kynnoh ba kila wiang ding ia ki ïing ha ka sngi Nyngkong ha ka shnong Litan Sareikhong bad ha ka thain ba marjan hapoh ka jylla Manipur jong ka Ukhrul district.
“Ka shnong Litan Sareikhong bad ki shnong ba marjan jong ka Sikibung ka dang don hapdeng ka jingshong syier naduh ka janmiet sngi u Blei, hadien ba ki ar kynhun kila ia donkti ban kawang maw kaba jur bha, kaba la pynlong ia ki bor pyniaid District ba kin pynmih ia ka hukum ban khang lad ba kan dang bteng,” Ong u heh ophisar.
Ki katto katne tylli ki iing kiba dei na ka jaitbynriew Thangkhul, Naga kila shah thang ha ka shnong Litan Sareikhong kaba la kynnoh ba leh ki kaikhlaw Kuki. Kala don ruh ka khubor ba ki don ki iing jong ki Kuki kiba la shah thang ha katei ka thain ba marjan.
Na ka liang ki bor pyniaid district kila nang wanrah shuh shuh ia ki bor pahara ha katei ka thain ban teh lakam ia ka shongsuk shongsain bad ruh ban khanglad ia ki jingjia kiba ktah ia ka suk ka sain bad kumjuh ruh la pyrkhing bha ia ka iaid ka ieng jong ki briew ba ishan khmat.
Ka order kaba la pynmih da u District Magistrate jong ka Ukhrul la kdew ba kala don ka jingbym shong suk shong sain bad ka jingpyni bor jong ki briew ha ka shnong Litan hapdeng ki jaitbynriew Tangkhul Kuki.
U district magistrate ka Ukhrul u la pynjari ruh da ka kyndon 122 jong ka Bharatiya Nyaya Sanhita (BNS), 2023.Kane ka kyndon ain ka long kumba mih bujli ha ka jaka jong ka kyndon 334 bad ka kyndon 335 jong ka Indian Penal Code (IPC).
U briew ba la mynsaw la tip kyrteng kum u AS Sterling, u khun jong u AS Paoshim uba dei na ka shnong Sarkaphung kaba don ha Ukhrul. Hadien kane ka jingjia la don ki khubor ba kala don ka jingsiat kuli da ki dkhot jong kine ki ar jaitbynriew, kaba la wanrah ia ka jingtieng bad ka jingklumar jingmut ha kane ka thain, wat lada kam shym la don kiba mynsaw na kane ka jingjia.
