Shillong, Nailur 22: U Myntri Kam pohiing ka jylla u Bah Lahkmen Rymbui hynne ka sngi, u la kyntait ban ai jingkular halor ka jingdawa ban thung iaka kynhun tohkit kaba laitluid ne ban phah tohkit haka Central Bureau of Investigation (CBI) halor ka jingshah siat iap u nongialam barim ka HNLC u Bah Cherishterfield Thangkhiew.
Dang shen ka sorkar kala rah hapoh ka iingdorbar thawain ka jylla iaka kaiphod jingtohkit halor ka jingshah pyniap u Bah Cheristerfield Thangkhiew hynrei kala mih pat ka jingbym hun jong ki paidbah bad sengbhalang halor katei ka kaiphod jingtohkit.
Ka kynhun tohkit kaba la khlieh da u Justice T Vaiphei kala kdew ia kiba bun ki jingduna bad jingbakla ha kane ka jingkhynra haba ong ruh ba katei ka jingkhynra kala pulom namar ba ki pulit kim shim la ioh kem im ia u Bah Cheristerfield uba lah ban ai iaki jingtip kiba kongsan ha kaba iadei bad ki kam pyntriem jong ka seng HNLC.
Ha kaba iadei bad ka jingdawa ki bahaiing bahasem jong u Bah Cheristerfield ia ka hok halor ka jingshah pyniap une u nongialam barim ka HNLC, u Bah Lahkmen Rymbui u la ong, baroh ki thrang ban ioh iala ka hok bad ka sorkar ka don ban ai iaka hok ia baroh.
