Shillong, Nailur 22 : Ka jingbym lah ban pynurlong ia ki mat jingdawa ba la buh da ki samla pule ka North Eastern Hills University (NEHU), ka Khasi Students Union NEHU Unit hynne ka sngi palei, kala leit khang tala shisyndon ia ka Ophis treikam jong u Vice Chancellor kaba la poi sha ka thma ktien kaba jur bha.
Ki dkhot jong ka KSU NEHU unit kila ialum paidbah hakhmat ka Adminstration Building bad khang ruh ia ka Ophis u VC Ka NEHU u Prof. Prabha Shankar Shukla, ba un ym ioh rung shapoh bad ban dawa ba dei ban iakren markhmat halor kiba bun ki ishu kiba ktah ia ki samla pule bad ia ka skulbah baroh kawei.
Kitei ki samla pule ki la buh shibun ki mat jingdawa sha u VC kynthup naduh ka jingduna ki nonghikai, ka jingduna ki kali ban leit shaw leit buh na bynta ki samla pule, ka Koit ka Khiah bad khamtam eh ka jingbym pynbit pynbiang bha ia ki hostel nalor kiwei kiwei.
Na ka liang u General Secretary ka KSU NEHU u samla Shibaitlang Rymbai u la iathuh ba ka skulbah ka la donkam kyrkieh ia ki nonghikai ban pyndap ia ki jaka ba thylli kiba long ka daw kiba ktah bha ia ki samla pule jong katei ka skulbah baroh kawei.
“Ki samla pule na ki tnad bapher bapher bun kim pat ioh ban shong klas namar ka jingbym don ki nonghikai watla ka semester ka la sdang mynta la arbnai ei ei,” u la ong
Shuh shuh u la pyntip ba watla ka jingthung ia ki nonghikai (quest faculties) ka dang iaid hynrei ka rukom pyniaid ka suki bha kaba long ka daw kaba ktah kylla pynban ia ki samla pule.
Shuh shuh la ong ba na ka daw ka jingduna ki kali ban leit shaw leit buh, ka la ktah bha khamtam ia kito kiba shaniah ha ki bos NEHU ban poi sha skulbah. Katkum ka jingong jong u ka jingduna ki kali ka pynlong ia ki bos NEHU ban kit khapngiah kaba la ktah bha ia ki samla baroh.
Haba iadei pat bad ki hostel u la ong, “Watla ka jingmaramot ka dang iaid hynrei ka suki bha kaba buh jingeh kylla ia ki samla kiba sah”.
Kumta halor kane u General Secretary ka KSU NEHU u la ong ba ki samla pule ki la ai por shi taiew ia u VC ban pynbeit ia ki jingeh ki samla mardor na ka bynta ka bit ka biang jong ki samla pule baroh.
