Shillong, Rymphang 04 : Ka Justice BP Katakey Committee kala bthah ia u Deputy Commissioner bad Superintendent of Police ka East Jaintia Hills, ba kin ithuh ia ki jaka kiba lah ban don ka jingtih dewiong beain bad ban pynkhlain ia ka jingiaid pahara khnang ban tehlakam ia kane ka kam be-ain.
Ha ka 34th interim report bala aiti sha ka Iingkashari Meghalaya High Court, ka Committee kala pynpaw ia ka jingdonkam ban ithuh ia ki jaka/shnong kiba lah ban don ka jingtih dewiong beain, da u Deputy Commissioner ha ryngkat ka jingiarap u Superintendent of Police ka District bad ban pynkhlain ia ka jingiaid pahara ha kine ki jaka bala ithuh ka ban long man ka por, namar ka kam tih dewiong beain ha EJHD ka dang iaid haduh mynta.
“Donkam ban pahara ia ki jaka rung bad jaka mih jong kine ki jaka khnang ba kan nym don ka jingkhaii ia u dewiong ba tih beain na kine ki jaka/shnong. Ia kane ka kam la donkam ban khmih da u DC bad u SP dalade, ki ban hap aiti ia ki kaiphod ba bniah manla u bnai kynthup ia ki kam ba kila leh ban khanglad ia ka jingtih dewiong beain bad ruh ki kam ba kila leh kat kum ki ain haba lap ia ka kam tih dewiong beain, sha u Chief Secretary ka Sorkar Jylla lane u briew ba u buh, u ba bat ia ka kyrdan ym hapoh ka kyrdan Additional Chief Secretary. U Chief Secretary/Addl Chief Secretary ki dei ban ai ia ki jingbthah ba donkam, na ka por sha ka por, ban pynthikna ia ka jingkhang ia ki kam tih dewiong beain ha EJHD” kala bynrap.
Ka Committee kala hukum ruh ban lilam noh mardor ia ki dewiong bala dep shim jingkhein, ban tohkit ia ka jingpyntip halor ka jingduna u dewiong ba 40,554.72 MT, bad ban mynjur ia ki aplikeshon ban khaii ia u dewiong hapoh ka 15 sngi.
“(Ngi ai jingmut) ban pyniaid noh mar mar ia ki kam ba iadei bad ka jinglilam ia u dewiong bala dep shim jingkhein da ka CIL ban lah pynkhuid noh ia ki dewiong ba sahkut ha ki depot bala buh da ka CIL khlem ka jingpynslem shuh. Pynlong ia ka jingtohkit da u Secretary ka Tnad Mining and Geology ka Sorkar Jylla halor ka jingduna u dewiong bala dep shim jingkhein kaba kot 40,554,72 MT na ki depot ka CIL ha EJHS bad ban aiti ia ka kaiphod hapoh ka artaiew”.
Ka Committee kala bthah ruh ban mynjur noh mardor bad pynmih ia ka hukumba donkam halor ka aplikeshon bala thep da ka Ruthina Marak bad Rukmini Marak, da ki bor khmih ka South West Khasi Hills District, ka ban long hapoh ka 15 sngi, ia kaba donkam ruh ban ioh ia ka jingbit n aka State Pollution Control Board, khnang ba u dewiong ba la thied na ka jinglilam yn lah ban khaii noh halor ka jingsiew ia ka pisa baroh bad ka jingbud ia ka Revised Comprehensive Plan,2022 nalor kiwei kiwei ki kyndon kiba la treikam.
“Ka Tnad Mining & Geology ka dei ban shim ia ki sienjam ha kabna pyndonkam ia ka pisa ba T.100 klur kaba la thep hapoh ka CPCB” ong ka Committee haba banjur ia ka jingdonkam ki jingtyrwa ban pyndonkam ia kane ka pisa.
