Shillong, Rymphang 02 : U Myntri Sorkar Bah Sosthenes Sohtun ula kubur ia ka jingeh kaba iai bteng ha Byrnihat na ka jingjaboh ka lyer bad ong ba kane baroh ka dei namar ka jingpynmih tbem na ki karkhana kiba don ha baroh arliang khappud ka Assam-Meghalaya.
“Ka jingjaboh ka lyer ha Byrnihat ka dei ka jingeh jong baroh artylli ki Jylla-Meghalaya bad Assam. Ngi donkam ia ka Central bad Assam Pollution Control Board ba kin leh da kaba tyngeh pyrshah ia ki kompani kiba pynkhein kyndon” ong u Bah Sosthenes haba iakren bad ki nongthoh khubor ha ka sngi Nyngkong.
Ula ban jur ia ka jingpyrshang ka Sorkar ban leh eiei halor kane ka kam, haba pynpaw ia ki jingeh ban ioh ia ki jingkhein ha ka por kaba biang bad ka jingdon ki katto katne ki karkhana kiba pynkhein iaki kyndon.
“Ngin sa buddien bad ka Tnad ban pynkloi ia ka jingleit check ba man ka por bad ban leh eiei pyrshah ia kiba pynjaboh” bynrap u Bah Sosthenes.
