Agartala, Nailur 22 : U MLA ka Congress u Sudip Roy Barman hynnin ka sngi Balang ula kynnoh ba ki runar (mafia) khaii drok ha ka jylla kila nang ioh bor namar ka jingkyrshan da ki nongialam sain hima kiba don ha ka bor.
“Baroh ngi tip mano ba donkti ha lyndet jong kine ki kam khaii drok.Kam don shuh kano kano ka jingbuhrieh na ki khmat ki jong ngi.U para jong uwei u myntri uba dei u nongialam ka kynhun khaii drok mynta kala paw pen ryngkew.Hato phim kwah ba ia kum kine ki briew yn wanlam sha ka jingtian bishar? U heh pulit ula shah pyniap ha ki nongkhaii drok bad ngi dang iai sah ha ka jingdum la kila don ne em kiba la shah kem halor kane ka jingjia.Ia kaba kum kane ka jinglong jingman dei ban pynkut noh,” kynnoh u Barman.
Haba aijingkren ha ka prokram kaba la long ha Sonamura, u Barman ula ong, “Dei tang ka seng Congress ka party sain hima kaba sngewthuh ia ka jingeh jong ki paidbah.Lada don ki party kiba sngewthuh ia ka jingeh jong ki paidbah, trei na ka bynta jong ki bad pynsngap ia ki jingeh ki jong ki, bad kata ka dei ka seng Congress.Ngi burom ia baroh.Ki kam sain hima jong ki jingbanbein kam dei kaba ngi ngeit kumba long ka party kaba synshar mynta ia ka jylla.
Halor ki jingpynkhreh sain hima kiba thmu ban pynrem ia ka BJP, ula ong; “Ka Seng Congress kan ym shongthait ban iakhun na ka bynta ban pynrem ia ka BJP.Ka Congress ka dei ka party kaba pdiang ia ka imlang sahlang, kaba pdiang ia baroh ki jait niam bad kaba iaid ha ka jingsynshar paidbah kaba shisha, bad ki mat treikam jong ka CPI-M ruh ki dei kiba iaid ha kajuh ka lynti.Nga kwah ban kyrpad ia ka party CPI-M ban wan shakhmat bad ia don lang ha syndah bad ka Congress ha ka jaka ban plie lynti ia ka party leh donbor ba kan wan biang ha ka bor synshar.”
Da kaba pynpaw ba ka ilekshon assembly ha u 2023 ka dei ka jingialeh na ka bynta ban pynim pat ia ki paidbah ka jylla, u Barman ula ong, “Kane kam dei satia tang ka ilekshon.Ka dei ka jingialeh na ka bynta ka im bad ka iap.Ka long ka jingshisha ba ngin ym lah ban jop tang marwei, hynrei ngin pyrshang ia kaba bha tam ban khanglad ia ka BJP ba kan wan biang ha ka bor synshar.Ngin iai bteng ban iakhun pyrshah na ka bynta ka bha ka miat jong ki paidbah.Ka BJP ka dei ka party jong ki riewsain hima kiba shisha kiba shim ia baroh ki lad ki lynti ban jop ilekshon katba ka Congress ka dei ka party jong ki nongialam kiba shisha kiba pynlut ia ka por ka jong ki ban pyrkhat na ka bynta ka lawei ha ka jaka ban pynleit jingmut tang ha kaba iadei bad ki ilekshon.”
Kila don haduh 3,162 ngut ki briew kiba la wan pyniasoh sha ka party Congress ha ka jingiadon lang u Barman, kata kaba kynthup ia ki 1,320 ngut na ka Trinamool, 716 na ka CPI-M abd 1,126 na ka seng Bharatiya Janata Party.
