Guwahati, Nailur 22 : U Dr Ranjit Das, uba dei u saiantis na ka jylla ka thain shatei lammihngi (Northeast) ka Assam ula lap thymmai ia ka jingkhein kaba kham paka ha kaba iadei bad ka rukom thew ia ka jingkhynniuh jumai, kata ha ka jaka jong ka ‘Richter scale.’
Kane ka jinglapdien bathymmai jong u Dr Ranjit Das napoh Assam laong ba kan mih bujli noh ha ka jaka jong ka jingthew jumai (Ritcher scale) kaba la neh 84 snem mynta, kata naduh ba la sdang ha ka snem 1935.
Ia kane ka rukom thew jumai kaba thymmai ba la lapdien da u Dr Ranjit Das yn tip kum ka Das Magnitude Scale (Mwg).
Une u geophysics scientist ka Assam ula lap ia kane ka jingkhein kaba thymmai kaba la pynshong nongrim lynga ka Physics kaba kham biang bad kham paka shuhshuh ban ia kaba la lap da u saiantis ka America u Charles Francis Richter, ong ka lad pathai khubor.
Ka Mwg ka dei ka jingnoh synniang ban sngewthuh ia ka physics jong ki jumai bad ki daw kiba la pynlong ia ki.U Dr Ranjit Das na Assam u shong u sah mynta ha ka ri ka thain South America hapoh Chile.
U trei mynta bad ka National Research Center for Integrated Natural Disaster Management (CIGIDEN) ha Santiago, Chile.Nalor kata u hikai ruh hapoh Universidad Catolica del Norte ha Antofagasta, Chile.Ha ka juh ka por u dei ruh u Associate Editor jong ka International Peer Reviewed Journal — Journal of Geophysics.
U Dr Ranjit Das 42 snem rta la kha hapoh ka shnong Dhekiajuli hapoh Assam bad u dei uba hynriew napdeng ki khyndai ngut shipara.
U kpa jong u, u Dhirendra Das, ula iehnoh ia ka kam na ka tnat Railway ban pyniaid ia ka dukan die soh kaba don marjan ka iingsah jong ki, katba ka kmie jong u, ka Bedena Das ka dei kaba shu shong iing.
U Dr Das ula pyndep ia ka jingpule skul ha ka Assamese medium bad bteng ia ka BSc (Physics) na Guwahati University,Assam ha u snem 2001.
Hadien ba ula pyndep ia ka graduation, ula pyndep sa ia ka Master of Computer Application na Tezpur University, Assam ha u snem 2004.Nalor kata ula pyndep ruh ia ka MTech ha ka Computational Seismology na Tezpur University ha ka snem 2008.Katba ha ka snem 2013 ula pyndep ia ka PhD jong u napoh IIT-Roorkee kata ha ka ba iadei bad ka ‘Earthquake Engineering.’ Hadien ula pyndep ruh ia ka Post Doctorate na ka IIT-Bombay ha u snem 2015.
