Shillong, Kyllalyngkot 27: Ka Dorbar Mang Tyngka ne Budget Session jong ka Meghalaya Legislative Assembly kaba 11, kan sdang naduh ka 16 tarik u Rymphang haduh ka 27 tarik u Rymphang.
Ha kane ka dorbar kaba 10 sngi, la mang 7 sngi na ka bynta ka Government Business bad 3 sngi ia ka Private Members’ business.
U Lamphang ka ïingdorbar Thawaiñ ka Jylla u Thomas A Sangma hynne ka Sngi Baar, ula ong ba ia katei ka tarik ban pynlong ia ka Dorbar la dep ban mynjur da ka Business Advisory Committee (BAC).
“Ngin shong 10 sngi pura ia ka dorbar, 3 sngi la mang na ka bynta ka Private Members Business bad 7 sngi ia ka Government Business,” ula ong.
Ula pyntip shuh shuh ia ka Mang Tyngka jong ka Jylla yn wanrah ha ka 20 tarik u Rymphang.
U Lamphang ula bynrap ba ka por shong dorbar lah ban pynjlan lada donkam, ban ailad ia ki dkhot ba kin ioh iashimbynta ha ka ïingdorbar.
Ula pyntip ruh ba ha ka sngi ba wanrah ia ki Supplementary Demand for Grants, ka jingiashong dorbar yn pynjlan haduh ka por 3 baje mynsngi.
Ha katei ka jingialang la wan iashimbynta da u Symbud Myntri Rangbah ka jylla uba khmih ia ka Parliamentary Affairs u Bah Prestone Tynsong, u Nongialam ka Liang Pyrshah u Dr. Mukul Sangma bad u MLA u Bah Paul Lyngdoh uba la iashimbynta da kaba shu leh Online.
