Kynrum kynram NEHU | Kyntu u Myntri ia u Prof Umdor ban shimti biang kum u Pro-VC

Shillong, K’lyngkot 23 : U Myntri ka Tnad Pule Puthi Bah Lahkmen Rymbui ula kyntu ia u Prof Sumarbin Umdor ban shimti biang ia ka kam kum u Pro Vice-Chancellor ka North Eastern Hill University (NEHU), haba pynpaw ba ym pat shym la pdiang satia ia ka shithi iehnoh kam ba ula aiti ha ka 15 tarik Nohprah 2025.

“Nga kyrpad ia u Prof Sumarbin Umdor ba un shimti biang ia ka kam khnang ba ka jingpyniaid ia ka Ophis ha Shillong Campud kan iaid la ka long kumno kumno ruh” ong u Bah Lahkmen haba iakren bad ki nongthoh khubor ha ka sngi Thohdieng haba ban jur ia ka jingktah kane ka kynrum kynram ka bym poi shano shano ruh ia ki kam pule dangle bad ka tulop ki nongtrei.

Kane ka jingkyrpad u Myntri kala wan hadien ba ki kynhun bapher bapher, kynthup ka NEHUSU, KSU-NEHU Unit, NEHUNDA bad NEHUTA kila iakynduh dang shen ia u Myntri Rangbah ka Jylla Conrad K Sangma bad Myntri ka Tnad Pule Pule, kiba la kyrpad ia ka Sorkar ba kan tuklar lem halor kane ka kam, kaba la mih na ka jingjah trei jong u Vice-Chancellor Prof PS Shukla mynta la 422 sngi.

Kane ka kynhun na NEHU kala dawa ia ka Pro-VC ka Tura ba kan shimti ia ka kam kum ka Acting VC kat kum ki kyndon jong ka Statutes ka NEHU.

U Bah Lahkmen u pyntip ba ka Sorkar Jylla kala iakren ia kane ka kam bad ka Sorkar Pdeng ba kan peit ba kane ka jinglong jingman ha NEHU ka dei ban kut noh kham kloi kat kaba lah.

“Ka Ministry haduh mynta kam pat ong eiei bad ki jinglong jingman ki dang iai neh kumjuh bad ngi tip ba u Pro-VC ka Shillong Campus Prof Umdor ula ai ia ka shithi iehnohkam hynrei haduh mynta ym pat shym la pdiang satia ia ka” ong u Bah Lahkmen.

“Ngi la ioh jingtip ruh ba ka don ka jingeh na ka liang ka Pro-VC ka Tura ba kan wan sha Shillong ban shimti ia ka kam kum ka Acting VC. Kumta lada ym don Pro-VC ha Shillong kaba dei ka headquarter ka NEHU, kan sa ktah ia shibun kiei kiei la ka dei ka pule dangle lane ka tulop ki nongtrei contract lane ki muster roll bad shisien ba kala ktah ia ka Shillong Headquarter, kan ktah haduh 70 tylli ki college ka Jylla ba la pyniasoh bad ka NEHU” ula bynrap.

U Bah Rymbui ula pynpaw “Naba kam pat don satia ka jingpynbeit kaban neh pura bad naba ka jingiehnohkam u Pro-VC ka Shillong ka dei ka bym pat pdiang, kumta, na ka bynta ka jingtreikam kaba iaid beit iaid ryntih jong ka University, nga kyrpad ia u Pro Umdor ban shimti biang ia ka kam khnang ba ki jingpyniaid kam hapoh ka Shillong Campud kin iaid beit iaid ryntih”.

“Nga kyrmen skhem ba ka Sorkar Pdeng bad ka Ministry of Education kin sa wanlam ia ka jingpyn beit kaba neh shirta” bynrap u Myntri.

Halor ka jingkylli, u Bah Lahkmen ula kyntu ia u Prof Umdor ba un buh hakhmat eh ia ka bha ka miat jong ki samla pule bad ki nongtrei da kaba ong “Nga buh ia ka jingkyrpad ym namar kino kino ki daw hynrei namar ka bha ka miat ki samla pule bad ka bha ka miat ki nongtrei, kumta, katba ngi dang ap ia ka rai ba khatduh jong ka Ministry, kan bha shibun ia u Pro-VC ban shimti biang ia ka kam”.