Guwahati, K’lyngkot 20: Ka sorkar kmie kala pyllait pisa ₹213.9 klur sha ka jylla Assam lyngba ka 15th Finance Commission (XV-FC) na ka bynta ban pynkhlain ia ki nongkit kam shnong kam thaw ha ki thain nongkyndong ha kylleng ki jaka jong ka jylla.
Ki heh ophisar ki la iathuh ba ia kane ka pisa la pyllait kum ka Untied Grants na ka bynta 2,192 tylli ki Gram Panchayat, 182 tylli ki Block Panchayat, bad 27 tylli ki Zilla Parishad ha Assam.
Ki grant ki dei kiba la ai jingmut da ka Ministry of Panchayati Raj bad ka Ministry of Jal Shakti kaba dei ka tnad umbam umdih bad ka khuid ka suba bad la pyllait da ka tnad pla tyngka ban kyrshan ïa ki Panchayati Raj Institutions (PRIs) bad ki Rural Local Bodies (RLBs).
Hapoh ka rukom treikam jong ka XV-Finance Commission, ïa ki grant ba la mang la pyllait ha ki ar ki bynta man la ka snem mang tyngka. Ka jingpynmih kaba mynta ka pyni ïa ka bynta kaba nyngkong na ka bynta u snem mang tyngka 2025–26.
Katkum ka jingong ki ophisar, ïa ki Untied Grants lah ban pyndonkam da ki PRI bad ki RLB ban pynbiang ïa ki jingdonkam ha ka thaiñ katkum ki jaka hapoh ki 29 tylli ki sobjek ba la kdew ha ka Khyrnit ba Khatwei jong ka Riti Synshar, khlem da kheiñ ïa ka tulop bad kiwei kiwei ki jinglut jingsep.
Katba ki Tied Grants, ki dei kiba la buh kyrpang na ka bynta ban pynbiang ia ki jingshakri jong ka imlang sahlang, kynthup ia ka jingpynkhuid bad ka jingpynneh ia ka kyrdan jong ka open defecation Free (ODF), kaba kynthup ia ka jingpyntuid ia ki jaboh jabaiñ ha iing, ka jakhlia jong ki briew bad ki kam kiba iadei bad ka jingsam um dih, kum ka jingpynpoi um, ka jinglum ia ka um slap bad ka jingpynkylla ia ka um.
Ki ophisar ki la ong ba kane ka jingpyllait la khmih lynti ba kan pynkhlaiñ ïa ka jingsynshar ba shapoh bad kan pynbha ïa ka jingai ïa ki jingshakri ba kongsan ha ki jaka nongkyndong ha kylleng ka Assam.
 na ka bynta ban pynkhlain ia ki nongkit kam shnong kam thaw ha ki thain nongkyndong ha kylleng ki jaka jong ka jylla.){kind=link}