Shillong, Kyllalyngkot 08: Ka seng Congress kala pynbna ia ka jingthmu ban pynlong ia ki jingiakhih kaban sdang naduh ka 10 tarik u Kyllalyngkot haduh ka 25 tarik u Rymphang pyrshah ia ka Sorkar NDA ba ialam da ka BJP kaba la rai ban pynkylla kyrteng ia ka Mahatma Gandhi National Rural Employment Guarantee Act (MGNREGA) sha ka Viksit Bharat‑Guarantee for Rozgar and Ajeevika Mission (Gramin) (VB‑G RAM G) Act, 2025.
“Ngi lah pynkhreh ban pynlong ia bun tylli ki jingiakhih. Halor katei ka mat, ngi dang ia trei bad pyrkhat. Kila pynduh noh ia ka MGNREGA bad kin sa pyntreikam noh da ka VB-G RAM G Scheme. Nga tharai ba kila ngiah ia ka kyrteng jong u Mahatma Gandhi, kaba phi baroh phi lah tip bad ki kwah ban pyniapher jaidbynriew” ong u Nongialam ka Congress u Bah Vincent H Pala hadien ba ula dep lum ia ka jingialang jong ka seng hynne ka sngi Palei.
U Bah Pala ula kynnoh ba katei ka skhim kaba thymmai kadei kaba la pynwandur ban knieh noh ia ka hok jong u duk u suk bad ka bym long kum ka MGNREGA.
“Ka jingkylli ban pynthikna kam mih shuh ha katei ka Bill kaba thymmai. Nuksa mynshwa ha ka MGNREGA lada phi kwah kam, phi dawa na ki bor kiba dei khmih bad ki hap ban ai hapoh jong ka 15 sngi bad lada kim ai kin hap ban siew hynrei ha ka Bill kaba thymmai, lada phi kwah kam kin phah sha ka sorkar pdeng bad ka sorkar pdeng kan sa bhah ia ka tyngka bad kan shong ha ki, la kin ai ne kin ym ai” la batai u Bah Pala.
U Nongialam ka Congress ula kynnoh ba ka sorkar BJP kala pynduh ia ka jingpyntreikam ia ki skhim kaba kynthup ia ka MGNREGA, bad pyndonkam ia ki kor ki bor kum ka Aadhaar bad geo-tagged system.
“Kila pyndonkam ia ka Aadhaar bun jait ki kor teknoloji ki bym lah ban shaniah kumba long mynta. Nuksa hapoh Shillong, phi ioh ia ka Internet kaba biang hynrei phim ioh pat ia ka Internet ha ki thain nongkyndong. Da ka jingbym ioh iaka Internet, kila knieh noh ia ka hok jong ki paidbah” ong u Bah Pala.
Ka seng ka thmu ban pynlong ia ki jingiakhih ha ki Zonal, District bad ha ka State Level bad ia ki jingtip kiba pura yn sa pynbna ha ka 10 tarik u Kyllalyngkot ha kaba yn sa ai ia ka jingpynbna ha ka ri baroh kawei.
“Ngin sa thad madan ia kawei hadien kawei. Kin sa shong shah thngan shipor ha ki District bad ngin pynlong ia ki jingiakhih ha ka Zonal, District bad State Level ruh” la bynrap u Bah Pala.
 sha ka Viksit Bharat‑Guarantee for Rozgar and Ajeevika Mission (Gramin) (VB‑G RAM G) Act, 2025.){kind=link}