Nongstoiñ, Nohprah 29: U Myntri Sorkar bad MLA ka Mawshynrut Bah Methodius Dkhar ha ka sngi Saitjain, u la hiar jurip ia ka jaka ha ka shnong Mawthengkut kaba la mang ban tei ïa ka Model Degree Government College.
Ia u Myntri la synran da ki Engineer kiba peit ïa ka jingpyntrei ïa katei ka College, ki riew rangbah na ki shnong ba marjan, ki samla bad katto katne ki longkmie.
Utei u nongmihkhmat haba ïakren bad ki lad pathai khubor, u la ong ba ka jingtei ïa katei ka College ka dei kaba la mang pisa haduh T.15 klur na ka skhim jong ka sorkar pdeng.
U la ong ba wat la ym pat buh mawnongrim, hynrei ïa ka kam say n sdang ban pyntrei noh ha kine ki khyndiat sngi ban wan. Na ka liang ka sorkar ka la bthah ïa u kontraktor ba u dei ban pyndep ia ka College hapoh u snem 2027.
U Bah Methodius ula ong ba ka jingïoh ïa katei ka College ha Mawthengkut, kan long ka jingkyrkhu bad ka jingmyntoi kaba khraw ïa ki samla pule kiba angnud bad thrang ban pyndep ïa ka jingpule jong ki.
“Kumba ka long haduh mynta ki paitbah nongshong shnong jong ka Mawshynrut constituency, ki dei tang ki nongrep bad ki nongbylla. Ban phah pule ïa ki khun ha sor Shillong bad ha kiwei kiwei ki jaka ki shem shitom bha, namar ki jinglut jingsep kiba bun naduh ka bai wai ïing ka leit ka wan bad kiwei kiwei”ula ong.
Une u Myntri Sorkar ula ong ba ki don bun bah ki samla napoh ka constituency kiba hap ban sangeh noh ïa ka jingpule jong ki tang shiteng por, namar kim lah satia ban kyrshan ba ka jinglut jingsep kaba bun. “Don ruh ki samla kiba hap ba sangeh noh namar ba ki hap ban ïarap lem ïa ki kmie ki kpa ban trei ban ktah ban bylla ban sngi na ka bynta kyrshan skul ïa ki para jong ki” ula ong.
Ki riew rangbah ka thaiñ Mawshynrut, ki la pynpaw ïa ka jingsngew kmen kaba khraw bad ki la pynpaw ruh ïa ka jingsngew nguh bad ai khublei ïa u MLA u ba la trei shitom met bad mynsiem ban wanrah ïa katei ka jaka pule ha katei ka shnong.
