Shillong, Nohprah 22: U Symbud Myntri Rangbah ba khmih ia ka kam Pohiing (Police) Bah Prestone Tynsong ula pyntip ba ka Sorkar kala bthah ia ki BSF bad ia ki Pulit ba kin pynkhlain ia ka jingpeitngor ia ki jaka khappud bad ka ri Bangladesh bad ban pynthikna ia ka jingshngain ki paidbah da kaba ai ia ka jingiada ba pura.
Kane ka jingbthah kala mih hadien ka jingshah thombor bad shah lute ki 5 ngut ki nongshongshnong ka Umniuh Tmar ha ki nong Bangladesh, kaba la jia ha ka 17 tarik Nohprah.
Ki runar ba Bangladesh kiba rah bad ki wait, kila lute naphang ia kine ki nong Umniuh Tmar ba kynthup ia 4 ngut ki Kynthei bad uwei u Rangbah bad kila knieh jubor ia ki jingdeng sohskhor ksiar, ki mobile phone bad ki tablet.
“Ka long kaba sngewsih ba kum kine ki jingjia kila jia….ngi la bthah ia ki BSF bad ki Pulit ba kin peitngor bha ha shilynter ka khappud ba jrong kumba 444 Km ba kan don ka jingshngain ia ki paidbah ba sah ha ki shnong khappud” ula ong.
U Bah Prestone u pyntip ba ka Sorkar kala lum ia ka jingialang bad u Inspector General ki BSF lem bad ka Director General of Police (DGP)-kaba la iakren ym tang ia kaei kaba jia ha Umniuh Tmar hynrei ban pynkhlain ia ka jingpeit ngor ha shilynter ka khappud ba 444 Km.
“Ngi hap ban long kiba husiar bad ba peitngor bha khamtam mynta ba ka jinglong jingman ka suk ka sain ha Bangladesh ka long kaba sniew bha” ula ong.
Haba kylli, u Bah Prestone u iathuh ba ki nong Bangladesh ki ju wan barabor da ki spah ngut ban tuh ia ki jingthung jingtep bad thombor ia ki briew ba sah ha khappud. “Ki nong Bangladesh ki da khein jingkhein bha bad syntiat bha ban wah leh ia ki kam runar ha ka por bym don ki shipai BSF” ula ong haba bynrap “Ngim kwah ba kum kine ki jingjia kin dang iai jia”.
“Ka DGP ryngkat bad u IG ka BSF kila iakren bad iaphylliew jingmut bad shimkhia bha halor kane ka kam” pynkut u Bah Prestone.
 Bah Prestone Tynsong ula pyntip ba ka Sorkar kala bthah ia ki BSF bad ia ki Pulit ba kin pynkhlain ia ka jingpeitngor ia ki jaka khappud bad ka ri Bangladesh bad ban pynthikna ia ka jingshngain ki paidbah da kaba ai ia ka jingiada ba pura.){kind=link}