Shillong, Nohprah 22 : Ki nongkyrshan ka kynhun ialehkai ka Jylla ki la khmih lynti ban iohi ia ka jingjop pyrshah ia ka Arunachal Pradesh ha ka jingialehkai kaba khatduh jong ka Group-E jong ka Senior Men’s National Football Championship ka Santosh Trophy 2025-26, ka ban long ha ka sngi Ba-ar.
Kane ka jingialehkai kan long ha ka por 4baje janmiet bad yn die ia ki tiket ha katei ka jaka.
Ka Meghalaya mynta ka don ha ka kyrdan ba shatrai eh jong kane ka group bad ka don jingkyrmen ban jam sha ka kyrdan ba hakhlieh lada ka lah ban khur ia ka jingjop. Kumba ka paw ba tang kawei ka kynhun kaba la lah ban jam sha ka wat ba khatduh (final round), kumta ka Meghalaya kan hap ban iakhun dohiap ban khur jingjop.
Lada ka Meghalaya ka lah ban khur jingjop kan pynlong ia baroh lai tylli ki kynhun ban kamai mar 3 point bad kan don ka jingiapher ha ka jingthep kol.
Ban jop tang 1-0 kol kam pat long kaba biang ia ka Meghalaya namar ka donkam ban thep la kumno kumno 2-0 kol shaneng khnang ban pynthikna ban jam sha kawei pat ka wat jingiakhun na ka Group-E. Katba ka Arunachal pat ka donkam tang ban shu pyniakhaid na ka bynta ban ioh lamkhmat na kane ka group.
Wat la kam shym la don bynta ha ka Sngi U Blei, hynrei ka Meghalaya ka la phai la ki khmat sha ka jingïakhun hapdeng ka Sikkim bad ka Arunachal namar ka la khmih lynti ba ka Arunachal kan khur jingjop bad ka la urlong shisha hadien ba u Rinchin D Karma u la ioh ban thep shi kol. Lada ka Sikkim ka la jop lane iakhaid kan long ka jingkut noh shi syndon ka jingiaid lynti ka Meghalaya ha kane ka lympung.
Kumba ka paw ki nongkyrshan ki la pyndap hi smam myn ha ka sngi Thohdieng ban ai jingkyrshan ia ka Meghalaya, hynrei kumta la khmih lynti ba sa shisien pat kin wan ban ai jingkyrshan bad ban ai mynsiem ia kane ka kynhun ha ka sngi Ba-ar.
