Shillong, Nohprah 21 : U nongialam ka Hynniewtrep National Liberation Council (HNLC) bad uwei u briew ba shah thwet halor ki kam leh beijot Khynnah, ki dei kiba la ithuh kum ki nongsuhbuit ha lyndet ka jingpynbthei bomb IED ha phyllaw ka Dhar Construction Company ba don ha shnong Shymplong, Easy Jaintia Hills.
Kane ka jingbthei bomb kala jia ha ka miet 15 tarik Nohprah, kaba la pynjulor ia ka trok kit um bad ym shym la don satia mano mano ba mynsaw khamtam ka jingiap briew kumba kam ka HNLC ha ka kyrwoh.
Hadien kane ka jingjia, ki Pulit kila kem ia u Richard Suchen (31) bad u Pynshaitbor Syih (45) kiba dei ki nongshongshnong ka Shymplong.
“Ka jingtohkit haduh mynta ki pynpaw ba uwei u briew ba kyrteng u Smiki Tongper ba na Shymplong bad uwei u dkhot ka HNLC Issei Sungoh na Khliehriat, kila iasylla bad pynbthei ia utei u bomb ha ryngkat ki arngut kiba shah kem” ong u Superintendent of Police ka EJH Vikash Kumar ha ka sngi U Blei.
“Katba u Smiki Tongper u dei uba la shah thwet ha kiwei ki case bala register hapoh ki kyndon ka POCSO Act, u Issei Sungoh u dei uba shah thwet halor ka jingpynbthei bomb IED ha Police Reserve ha Khliehriat lem bad kiwei ki kam beain” ong une u Heh Pulit.
Ki Pulit kila khynra ia ka iingah u Tongper bad kila ioh kurup bun ki tiar shna bomb ba kynthup ia 3 roll ki safety fuse bad 2 tylli ki safety fuse ba rit, 3 tylli ki detonator, u bakhor, 82 tylli ki splinter, kawei ka suloi shna hi bad 2 tylli ki handset bad 5 tylli ki fuse.
Ia kane ka case la register ha Lumshnong Police Station hapoh ka kyndon 109(1), 113(1), 113(2), 113(3), 326(f) bad 327(2) jong ka Bharatiya Nyaya Sanhita, bad ka kyndon 3 jong ka Explosive Substances Act.
Ka HNLC kala kam ia ka jingdonkti ha kane ka jingpynbthei bomb haba kynnoh ba ka thmu pynlong sohpdung ia ki nongkynti u Symbud Myntri Rangbah ka Jylla Bah Sniawbhalang Dhar namar ka jing kyntait ban siew ia ka pisa ba dawa.
U Myntri Rangbah ka Jylla Conrad K Sangma ula maham ba ka Sorkar kan ym shu sngap ia kum kine ki kam be-ain haba pynpaw ba ki bor ka ain kila don bun ki sakhi ba kin leh da kaba tyngeh.
 bad uwei u briew ba shah thwet halor ki kam leh beijot Khynnah, ki dei kiba la ithuh kum ki nongsuhbuit ha lyndet ka jingpynbthei bomb IED ha phyllaw ka Dhar Construction Company ba don ha shnong Shymplong, Easy Jaintia Hills.){kind=link}