Shillong, Nohprah 19: Hashwa ban ioh rakhe ia ka Khristmas, ka Sorkar Meghalaya kala pynbna ba pynlait kloi noh ia ka tulop kaba shi bnai bad ia ka bai bam tymmen ne Pension, ka ban ai jingmyntoi ia kumba 50,000 ngut ki nongtrei ha ka jylla bad palat 30,000 ngut kiba ioh ia ka bai bam tymmen.
Kane ka sienjam kadei da ka jingthmu ban pynrhem ia ka jingrakhe ha kylleng jong ka jylla.
Katkum ka kyrwoh kaba la pynmih da ua Commissioner & Secretary uba khmih ia ka Pla Tyngka u Dr Vijay Kumar ha ka sngi Saitjain, ula ong, “Ka Finance Department kala pyllait lypa ia ka tulop kaba shi bnai bad ia ka Pension kaban ai jingmyntoi ia kumba 50,000 ngut ki nongtrei bad palat 30,000 ngut ki Pensioner ban pynrhem ia katei ka jingrakhe ha kane ka aiom lehkmen. Nalor kane, la pyllait ruh ia ka jingsiew na ka bynta baroh ki nongtrei Casual bad Contractual kiba trei ha kylleng ki bynta jong ka jylla”.
Kane ka jingpyllait lypa ia ka pisa kala kot sha ka T.348.1 klur na ka bynta ka tulop, T.93.4 Klur ia ka Pension, T.9.7 Klur na ka bynta ki nongtrei Casual bad T.4.1 Klur na ka bynta ki nongtrei Contractual.
Nalor kane, ka tnad kala pyllait ruh ia ka T.255.5 Klur na ka bynta ki 3 tylli ki District Council jong ka jylla ban pyndap ia ka tulop kaba sahteng ban siew.
Nalor kane la pyllait ruh ia ka pisa ne bill jong ki Kontraktor, ha kaba la pyllait ia ka T. 416.1 Klur na ka bynta ki kam kiba heh ne Major Works (object head 53) bad T.154.7 Klur na ka bynta ki kam kiba rit ne Minor Works (object head 57).
Ki tnad kiba kongsan kiba la pyllait ia ka pisa ki kynthup ia ka, Public Works T. 256.4 Klur, Urban Affairs – T.102.5 Klur, Public Health Engineering – T. 68.6 Klur, Sports & Youth Affairs – T.60.0 Klur, Power – T.60.0 Klur, Health & Family Welfare – T.14.0 Klur, Community & Rural Development – T.102.9 Klur bad ka Agriculture & Farmers Welfare – T.69.5 Klur.
Kane ka jingpyllait ia ka pisa kadei ruh ka jingpyni ia ka jingai jingkyrshan ia ki skhim, da kaba kdew ba T.23 Klur lah dep ban phah sha ki 92,051 ngut ki nongioh jingmyntoi hapoh jongka Focus+ scheme lyngba ka Direct Benefit Transfer (DBT).
“Ka tnad Pla Tyngka kala pyllait ia ka pisa baroh kaba kot T.1602.9 Klur ha u bnai Nohprah na ka jingdon jingem ka jylla ne State Resources, kaba kdew ia ka jingkiew kaba 30.8% haba ianujor bad u snem uba la dep, khnang ban rakhe ia ka Khristmas ha kylleng jong ka jylla” la ong u Kumar.
Ha kawei pat ka liang, u Myntri Rangbah u Conrad K Sangma, uba khmih ia ka Pla Tyngka, ula phah ia ka khubor ban ai khublei Khristmas bad Snem Thymmai basuk ia baroh ki nongshong shnong ha ka jylla.
