SHILLONG, DEC 20: Ki nongialam ka jylla Meghalaya, hynnin ka sngi kila iashimbynta ha ka jingrakhe lypa ban pdiang ia ka Khristmas bad ia u Snem Thymmai, ha ka jingialang kaba la pynlong ha ka Iingdorbar thawain bathymmai ka jylla kaba don ha Mawdiangdiang, New Shillong Township.
U Myntri Rangbah ka jylla u Conrad K Sangma, u Lamphang u Thomas A Sangma, u Deputy Speaker u Limison D Sangma bad u Symbud Myntri Rangbah u Sniawbhalang Dhar kila wan ban iashimbynta ha kane ka jingialehkmen.
Haba kren ha ka jingialang u Thomas A Sangma ula ong, ba kadei ka khyllipmat jong ka jingkmen kaba khraw bad ka kabu ban rakhe ia ka Khristmas ha ka Meghalaya Legislative Assembly bathymmai.
Ula ong, ba ka Khristmas kadei ka por ban khmih ialade bad ban pynthymmai kaba pynkynmaw ia paidbah ia ka jingieid jong u Blei bad kaba ai mynsiem ia baroh ban pyniar ia ka jingsbun, jingsngewthuh bad jingleh isynei ia kiwei pat.
Ula pynpaw ia ka jingkyrmen ba ka jingshai u Khrist kan iarap ha kaban btin ha ki jingmut jingpyrhat, ka jingjied bad ban shakri ia ka imlang sahlang bad ula ai khublei ia baroh ki MLA kiba la wan iashimbynta ha kane ka prokram.
Katba u Limison D. Sangma ula ong, ba hapoh ka jylla Meghalaya, ka Khristmas kam dei shuh tang ka jinglehkmen ha ka niam hynrei kala kylla long kum shi bynta ha ka imlang sahlang hapoh ka jylla.
Ula pynpaw ba watla ka Khristmas kadei kaba don ia ka jingiadei kaba la ngam jylliew bha ha ka niam, hynrei katba nang iaid ki por kala kylla long kum ka jingrakhe ha ka pyrthei baroh kawei ban iakmen, ieid bad ban don ka jingkyrmen, kaba ai mynsiem ia ki briew ban iasam lang ia ka jingsbun, jingnoh synniang bad ka jingsngewkhia ia kito kiba donkam.
Haba kren maitphang u Bah Andrew Simons, Commissioner and Secretary, jongka Meghalaya Legislative Assembly, ula ong, ba ka Khristmas ka long kum ka jingpynkynmaw ia ka jingkordor ka jingieid, jingsuk bad ka jingleh isynei bad ka jingdon mynsiem para briew. Ula ong ba ka khubor jong u Trai Jisu Khrist ka ieng kum ka dak jongka jingkyrmen ia ki briew bad ka khot ia baroh ban shakri da ka jingkylluid mynsiem, ban tei ia ka jingiadei bad ka jinglong shipara ha ka imlang sahlang.
Ula bynrap ba kane ka jingrakhe kadei ka kabu ban khmih ia kitei ki jinglong kiba kordor bad ban pynthymmai ia la ka jingkular na ka bynta ban pynsaphriang ia ka jingkmen, jingsngewthuh bad jingiatylli.
U Neil Vimal Kumar u Ministry Director jongka Life Focus Society, Chennai, sula sam ia ka khubor Khristmas bad buh jingduwai ha kane ka jingialang.
Ha ka jingsam ia ka khubor, u Neil Vimal Kumar ula ong ba ka Khristmas ka ieng kum ka dak jong ka jingiadei kaba iajan hapdeng u Blei bad ki briew ha ka lynti kaba shimet shimet, kaba pynlong ia ki briew ban sngewthuh ia ka jingieid u Blei lyngba ka jingdonlang ka jong u.
Hashwa kane, la pynlong ia ka jingbuh jingduwai kyrpang, da ka jingsdang ia ka jingpule na ka Bible da u BA Sangma, Manager jongka Assembly Press.
La ioh ruh ia ki jingrwai kyrpang na ki khynnah jongka Children of God’s Dream Children’s Home, Lumshyiap, Langkyrding, ka Meghalaya Legislative Assembly Choir bad ka Mahila Band jongka Nagaland Police ne ka 15th NAP (IR) Mahila Band kaba dei ka kynhun tem jong ki pulit kynthei na Nagaland kaba la ioh ia ka jingithuh ha ka ri kaba la ioh rung sha ka Final jongka India’s Got Talent (IGT) Season 10 ha u snem 2023 kaba la pynshohbiej ia baroh kiba la wan sha kane ka jingialehkmen.
Hadien kane, u Myntri Rangbah u Conrad K Sangma bad u Lamphang u Thomas A Sangma ryngkat bad ki MLA kila iashimbynta ha ka jingot ia u Cake Christmas, ha kaba la iadonlang u Myntri Sorkar u Bah Metbah Lyngdoh bad ki MLA kiba kynthup ia ka Kong M Ampareen Lyngdoh, Bah Ronnie V Lyngdoh, Bah Paul Lyngdoh, Bah Alexander Laloo Hek, ka Miani D. Shira, u Mizanur Rahman Kazi, Bah Matthew Beyondstar Kurbah, u Marthon Sangma, Bah Synshar Lyngdoh Thabah, Bah Gavin Miguel Mylliem bad u Bah Pius Marwein.
