Shillong, Nohprah 19 : U Myntri Rangbah ka Jylla Conrad K Sangma ula pynbna ia ka rai kaba kongsan jong ka Kynhun Myntri, ban pyntreikam noh ia ka rukom siew tulop ba thymmai, ka jingpynkiew tulop ba manla u Snem bad ka jingshngain ka kam ia palat 23,000 ngut ki nonghikai Adhoc bad SSA ha Jylla.
“Mynta ka sngi ka Kynhun Myntri kala shim ia ka rai ba kongsan bad ka jingpynkylla kaba heh haba phai sha ka liang ka kam pule dangle” ong u Conrad haba iakren bad ki lad pathai khubor hadien ba dep pyniaid ia ka jingialang ba khatduh jong ka Kynhun Myntri mynta u snem, hynne ka sngi Thohdieng.
“Ngi la mynjur ia ka jingtyrwa ban pynbeit ryntih ia ka rukom siew tulop ia ki nonghikai Adhoc bad SSA, ryngkat ka jingpynkiew tulop ba manla u snem bad ban pynheh ia ka tulop kat kum ka jingtrei slem ha ka kam” ula ong.
U Myntri Rangbah ula bynrap ba ka jingshngain jong ka kam ruh lah pynthikna na ka bynta kine ki nonghikai, da ka kyndon ban synniang sha ka Contributory Provident Fund (CPF) da kine ki nonghikai bad ka Sorkar.
“Ia kane yn sdang pyntreikam naduh ka 1 tarik Iaiong, 2026 kumba la kular” ong u Conrad haba pynpaw ia kane kum ka “Ka khubor Khristmad ba bha na ka bynta ki nonghikai”.
“Nga la pyndep ia ka jingkular ba nga la ai sha ki Nonghikai. Bad ha kine ki lai bnai ban wan hadien u Snem ba thymmai, ngin sa pyndep ia ki kam ban pyntreikam ia ka, kum ki jingdonkam ban pyndep ki Ophis” ula ong.
Kane ka rai ka kdup ia kumba 23000 ngut ki nonghikai Adhoc bad SSA. Halor ka jinghap pynlut pisa, u Conrad ula ong ba ka jingpynlut kan bun hynrei u khlem pynpaw satia katno.
“Kane kan dei ka jingpynkylla kaba khraw bad ka rai ka ban sa pynkylla ia ka kam pule dangle” ula ong haba ai khublei ia ki Nonghikai, u Myntri ka tnad pule puthi bad ki Ophisar namar ka jingtrei shitom jong ki.
