Plie paidbah ka KSU ia u motdur u Myllung Soso Tham ha ka lyngkhuh sngi iap ba 85

Shillong, Nohprah 19 : Ka Khasi Students Union (KSU) ha ka sngi Palei kala plie paidbah ia u motdur ba shiryngieng jong u Myllung Soso Tham ha NEHU Campus, ha ka jingrakhe ia ka lyngkhuh sngi iap ha 85 snem ha NEHU Campus.

Haba ai jingkren, u Chairman ka NESO Bah Samuel B Jyrwa ula ban jur ia ka jingiadei ki poitri u Soso Tham ha ka juk ba mynta, da kaba ong ba ka pynkynmaw ia ka Jaidbynriew ban iakhun ia ka hok trai ri trai muluk.

“Haba ngi pule ia ki poitri u Soso Tham, ka pynlong ia ngi ban shemphang ba ngi donkam ban mih shakhmat bad iakhun na ka bynta ka jingmyntoi bad ki daw bah jong ka jaidbynriew trai ri trai muluk” ong u Bah Samuel.

Ula kren halor ki jingtrei ba iohi jngai jong u myllung bad ong “Ki poitri jong u ki iadei bha bad ka juk jong ngi mynta” haba ban jur ia ka jingdonkam ban don ki ain kiba treikam bha kum ka ILP bad MRSSA.

Haba pynrem jur ia ka Sorkar ba kam shym la leh eiei, ula ong ‘Wat hapdeng ki jingkular, ka Sorkar kan dang ban pyntrei kami a ka MRSSA” haba pynkynmaw ia ki jingiakhih jong ki snem bala leit kiba pyni ia ka jingbym sngew shngain jong ka Jaidbynriew.

“Nga ngeit skhem ba ia kane ka jingialeh yn hap ban pynim biang ban weng ia ki jingeh kiba ngi iakynduh” ula bynrap.

U President ka KSU Bah Lambokstar Marngar ula ban jur ia ka jingkordor ki kam u Soso Tham bad ong ba ki kam jong u, kila ai mynsiem ia ka Jaidbynriew ba kan iakhun na ka bynta ki lad jingiada.

“Ka lyngkhuh sngi iap u Soso Tham ka pynkynmaw ia ngi ia ki synniang ba khraw jong u sha ka Jaidbynriew Khasi” ong u Bah Lambok haba bynrap “Kam don jingmut ia ngi ban im 100 snem khlem da noh synniang eiei sha ka Jaidbynriew”.

U Bah Lambok ula iai ban ia ka jingkut jingmut jong ka KSU ban shimkhia ia ki jingeh jong ka Jaidbynriew haba maham pyrshah ia ka jingkhein sting.

“U Soso Tham ula maham ia ngi ba ngi lah ban long ki nongtong um jongno re jongno. Ki bor ba nabar kila ap kmang ia kane ka khyllipmat” ula ong.

Ula pynrem jur ia ka Sorkar halor ka jingpynslem ia ki ain ban iada ia ka jingmyntoi ki paid trai ri trai mukul, haba kdew ia ka ILP bad MRSSA. “Ki Samla kin dei ka ain ban iada ia ka Jaidbynriew bad ia ka khyndew ka shyiap” maham u Bah Lambok.