Shillong, Nohprah 15 : U Lat ka Jylla CH Vijayashankar ula kyntu ia ki University bad ki College ba kin shim ia ki sienjam kiba treikam bha ban pynsngew sha ki samla pule halor ki jingktah jong u droks bad ban kyrshan ia ka Jingialap pyrshah droks kaba iaid mynta hapoh ka Ri.
U Lat ula buh ia kane ka jingkyntu ha ka jingialang ba ula pyniaid bad ki Vice Chancellor, ki Principal bad ki Khlieh jong ki jaka pule ka Jylla, haba ban jur ia ka jingdonkam ban iashimlang ia ki sienjam bad iadonbynta lang ruh bad baroh ki kynhun kiba don bynta ha kane ka kam.
“Ki samla ki dei ki jingdon jingem kiba khraw tam jong ka Ri, bad ngi hap ban iada ia ki na ka jingpynjot jong u droks” ong u Vijayashankar.
“Tang lyngba ka jingiatreilang kaba iajan hapdeng ki jaka pule, ki nongialam shnong, ki kynhun ba trei ban tei ia ka imlang sahlang bad ki bor Sorkar, ka ban pynlah ia ngi ban poi sha ka thong” ula ong.
Ka jingialang ka dei kaba la pynlong ban pynsngewthuh ia ki jaka pule bad ki nongmihkhmat ka imlang sahlang ba kin iadon bynta lang ha ka thma pyrshah ia u droks.
Ki nongmihkhmat na ki jaka pule ba paw, kynthup ka NEHU, IIM, NIT bad Shillong College, kila iashimbynta.
“Ngim dei tang ki jaka pdeng ban ioh ia ka jingnang jingstad, ngi dei ki jaka ba saindur ia ka jingmut jingpyrkhat ki samla, ki jingangnud ki suhthied bad ba hikai ia ka akor ka burom” ong u Principal Secretary y Lat HC Chaydhary,
U Lat ka Jylla ula tyrwa ban ithuh bad pynkup burom ia ki shnong kiba la pynbna ialde kum ki “Nasha Mukt Village”.
