Shillong, Nohprah 15 : Ka jingpyrrkhing iaid ki kali bala buh da ka por ha ka lynter ka surok Shillong-Dawki ba hap hapdeng ka Laitlyngkot haduh Lyngkyrdem, yn sa weng noh naduh ka 18 tarik Nohprah, 2025 haduh da pynmih da kawei pat ka jingpynbna.
Hynrei, ki jingpyntrei ia ki kam ba rit ba ria bad kiwei ki kam ki lah ban bteng man ka por, ka ban ktah ia ka iaid ka ieng ki kali la kumno kumno ruh hapdeng 10-15 minit.
Ki nongpyndonkam ia kane ka surok la bthah ba kin iai long kiba phikir, iatreilang bad ki briew ba don ha ki jaka ba pyntrei ia ka surok bad ban pynbeit bha ia ka leit ka wan jong ki.
Ia kane ka jingpyntip la pynmih da u Additional Deputy Commissioner ka Pynursla Civil Sub-Division, ban pyntip sha ki paidbah bad pynthikna ia ka jingbud ryntih ia ka.
