Shillong, Nohprah 15 : Ka Iingkashari Meghalaya High Court kala bthah ban pyndep noh ia ka jingithuh ia ki jaka shong dukan madan ia ki briew ba die dukan rud surok ha ki thain Laitumkhrah hapoh u bnai Kyllalyngkot 2026.
Ia kane ka hukum la pynmih da ka division bench ba kynthup ia u Chief Justice Soumen Sen bad Justice HS Thangkhiew ha ka 10 tarik Nohprah, hadien ba shimkhia ia ki kam bala leh da ka Shillong Municipal Board.
“Halor ki kam bala leh bad ki jingpynpaw ha ka affidavit ba ia ka jaka shong dukan ki nongdie madan lah khmih lynti ban pyndep hapoh ka taiew ba nyngkong u Kyllalyngkot, 2026, buh noh ia kane ka kam ban shong bishar biang ha ka 28.01.2026. Ka Shillong Municipal Board ka dei ban nang ai shuh shuh ia ka kaiphod ha ka dur jong ka affidavit ha kane ka sngi bishar” ong ka Iingkashari.
La pyntip ia ka IIngkashari ba napdeng ki 43 tylli ki jingkam, 14 ngut ki nongdie dukan madan la kynthup ia ki ha ka thup bala pynmih da ka Provisional Town Vending Committee (PTVC), bad sa 15 ngut ki nongdie dukan madan la shem ba ki dei shisha ki nongshong dukan madan bad la ai jingmut ban leh eiei na ka bynta ka jong ki.
Ka PTVC kala rai ban pyndep noh ia ka thup ki nongshong dukan madan bad ka Sorkar ruh kala dep ban pynbna ia ki jaka bala ithuh ban buh dukan madan.
Ka Sub-Committee kala pynkhreh ia ka Standard Operating Procedure ban sngap ia ki jingkam bad jingpyrshah ia kiba aplai licence.
