Shillong, Nohprah 15: U Myntri Rangbah ka jylla Conrad K. Sangma ha ka sngi Nyngkong, ula buh ia u mawnongrim ban tei ia ka Meghalaya House Annexe ha 9, Dr. A.P.J. Abdul Kalam Road, New Delhi.
Ia kane ka jingtei ka ba thymmai un tei ha ki artylli ki wat. Ka wat kaba nyngkong kan kynthup ia 24 tylli ki Guest Rooms ne kamra sah ryngkat bad kawei ka jaka pynlong jingialang ne Meeting Hall bad yn tei ha ka jinglut jingsep kaba kot T.22 Klur. Kane kan dei kaba la tei ha ka jaka kaba don ka Meghalaya House complex kaba rim kaba la tei naduh u snem 1971 ha ka jaka kaba don 1.99 akar.
Haba kren ha ka jingialang, u Myntri Rangbah ula ong ba ka Meghalaya House ha Delhi kadei ban ai jingshakri ia ki paitbah ka jylla ban pynthikna ba kan long kaba jaka kaba sngewtynnad bad kaban pdiang ia ka jingwan sah ki nongwankai bad ki ophisar ruh kumjuh.
Ula pynpaw ba ka jingdon shuh shuh ki kamra sah kan iarap ha kaban pynbiang ia ka jingkiew ki paitbah kiba na Meghalaya kiba wan sha Delhi na ka bynta ban iashimbynta ha ki jingialang, ban leh interbiw, eksamin, ki bynta kiba iadei bad ka koit ka khiah bad kiwei kiwei ki kam.
Ula bthah ia ki ophisar ba kidei ban pynthikna ba kane ka jingtei kaba thymmai kadei ban tei ha ka kyrdan kaba hajrong eh, da kaba buh jingmut ia ki jingdonkam bad ia ki tiar ki tar katkum kane ka juk kaba mynta.
“Ngi kyrmen skhem ba ngin sa don ia ki jingtei kiba biang bha bad kaba lah ban ai ruh ia ka jingshakri kaba bha” ula ong.
U Myntri Rangbah ula pynpaw ba ka Meghalaya House kadei ban kylla long kaba nyngkong eh, kaba ki nongshong shnong ka jylla kin jied haba ki wan sah ha Delhi.
“Shisien ba la pyndep, ki 24 tylli ki kamra sah kin iarap shibun ban kyntiew ia ka jinglah ban ai jaka sah ia kiba wan na Meghalaya. Nga khmih lynti ba yn tei pyndep kloi ia kane ka projek” ula bynrap.
Haba banjur ia ka jingkongsan ban pyninam ia ka kolshor, u Myntri Rangbah ba kane ka jingtei kadei ban long kaba donnam bad ban pyni ia ka kolshor bad ia ka riti dustur jong ki paitbah ka Meghalaya. Ula banjur ba ki jaka na ka bynta ki paitbah kidei bna long kiba la phaikhmat ban shakri ia ki paitbah ka Meghalaya ha ka rukom kaba bha tam.
“Tang ka jingshna ia ka jingtei kaba thymmai kam pat biang. Ka bynta jong ki briew ruh ka long kaba kongsan bha. Ka jingrkhie, ka jingpdiang da kaba sngewbha ia kiba wan sha Delhi ha ka sien kaba nyngkong na Meghalaya ka lah ban wanrah ia ka jingiapher haba ki sah hapoh jongka Meghalaya House,” ula ong.
Ka jingtei ia ka Meghalaya House Annexe kadei kaba la khmih lynti ba kan pynkhlain shibun ia ka jingdon ka jylla ha ka nongbah jong ka ri bad ban pynbha ia ki jingdonkam jong ki nongwankai na Meghalaya.
Ha kane ka jingialang la iadonlang u Symbud Myntri Rangbah ka jylla u Bah Prestone Tynsong, u Myntri ka tnad General Administration Department (GAD) u Bah Sosthenes Sohtun.
