Shillong, Nailur 19 : Ki Non- Teaching Staff Association ka North Eastern Hill University (NEHUNSA) hynne ka sngi Nyngkong kila rai ban pynlong da ka jingsangeh treikam ba khlem buh por hapoh ka Tnad Examination naduh ka sngi ba-ar ban pyrshah ia ka jingpynjlan ia ka contract jong u Officer on Special Duty (OSD) ba mynta.
“Ka lawei jong ki samla pule ka University bad kumjuh ruh jong ki College ba pyniasoh, ka don ha ka jingma lada dang ailad ia u OSD ba mynta ba un dang bteng ia ka kam. Namar kata, ha ka jingialang bah (ba long hynne) la iarai baka Tnad Examination kan sangeh treikam naduh ka 20 tarik Nailur tad haduh da pynbna da kumwei pat” ong u NEHUNSA ha ha kyrwoh.
Une u OSD ba mynta u dei uba la shongthait kum u Controller of Examination ha ka 31 tarik Nohprah 2020 hynrei la pynjlan ia ka kam OSD naduh katei ka por haduh mynta.
Halor ki mat iakhih, ka Association kala ong ba ka jingshon ia ki marksheet ym shym la lah satia ban leh namar ka jingbym don ki tiar jingdonkam (UG marksheer peper, sticker/mark list). La pyntip ia kane sha u OSD hynrei u khlem leh eiei naka liang jong u halor kane ka kam mynta la jan lai bnai.
“La ioh jingtip ruh ba ki kot ba don ia ki lad jingiada ban shon ia ki syrnot (Migration, Degree, Provisional bad kiwei) naka bynta ki samla bala pass ruh kim don satia. U OSD u khlem leh eiei ia kane haduh mynta” kila kynnoh.
Ka NEHUNSA kala kynnoh ba ki Ophisar bad ka Purchase & Store Section, kala pan jingtip ruh la ka donkam ne em ban bujli ia ka printer ba lah ban shon bun ki kot (heavy duty) hynrei une u OSD ula sngap man man ia ka file bala phah sha u.
“Watla ki samla pule kila siew ia ki jingsiew ba donkam ba kynthup ia ki Transcripts, MPhil/PhD Thesis, ki shithi ba donkam bad kiwei kiwei, ka Tnad kam lah satia ban ai ia kine ki kot ki sla namar ka jingbym don pisa naba u OSD u khlem leh eiei ban pynioh pisa sha ka Tnad” kila ong.
“La pyntip ruh sha ngi ba u OSD u khlem eiei mynta la lai snem haba iadei bad ka jingbuh ia ka pisa ban shna ne sumar ia ki Software Vendor jong ki Computer Software, ban pynkhlain shuh shuh ia ka server/network. Kine ki dei ki kam ba kongsan bha naba baroh ki data jong ka Tnad Examination la buh ha kane ka database” ong ka Association.
