Tura, Nohprah 12 : Phra tylli ki shnong ha sor Tura, ba kynthup ia 754 tylli ki Longiing, kila jaw ia ki ummat ba kmen hynne ka sngi Thohdieng namar khatduh kila ioh ia ki kot pata ba shong wai ha ka jaka ka Sorkar, kaba kila shong la sah da ki snem.
Kine ki longiing kila sah ha ki jaka ka Sorkar, kaba buh ha ka jingma ia ki ban shah kyndang bad bun ki jingeh kiba ap. Ia kine ki kot pata la aiti da u Myntri Rangbah ka Jylla Conrad K Sangma ha ka jingiadonlang u Myntri Sorkar Marcuise N Marak.
Ha kane ka sngi, ka Sorkar kala ai haduh 452 bigha ka jaka sha kine ki longiing hapoh ka nongrim ba ki dei ki nongshong wai ha kine ki jaka.
U Myntri Rangbah ula pynpaw ia ka jingsngew myllung haba u pynkynmaw ia ki jingpyrshang u Kpa P.A. Sangma. “P.A Sangma ula pyrshang ban pynbeit ia kane ka kam.
Ka dei kaba la sahteng la slem bha….u ju ong barabor, “Kiei kkine ki briew kiba sah ha ka jaka Sorkar? Ki dei ki briew jong ngi, bad ngi dei ban iarap ia ki” ong u Conrad haba jaw artad ki ummat.
Ula iathuh “U (Purno) u ju ong ia nga ba lada u Blei u ai ka lad ia nga, phi dei ban shimkhia ban pynbeit ia ka jingeh jong ki briew jong ngi. U PA Sangma uju iathuh ha ngi ia ki thong jong u na ka bynta ki paidbah bad ki shnong ki thaw bad hikai ia ngi ban buh hakhmat shuwa ia ki paidbah”.
U Myntri Rangbah ula pynshai ba kane ka rai kam dei satia ka jingleh politics. “Nga lah dei ban shim ia kane ka rai tang mar syn dep ka elekshon, hynrei ka jingthmu jong ngi ka long ban shakri khuid ia ki paidbah bad ai ki jingiarap”.
Ula kyntu ia kine ki shnong ba kin pdiang ia ki kot pata bad ban pyndep ia ka jingsiew instalment. “Ngam pynbor iano iano ruh ban pdiang ia ka. Katba u Conrad u dang don ha ka shuki, ngin ym kyndang iano iano ruh. Hynrei nga khuslai ia kaei ka ban jia hadien jong nga. Kumta, haba ngi ai ia kum kane ka lad, ki paidbah ki dei ban shim kabu ia ka”.
Ula pyntip ba kine ki kot pata ki dei kiba lah ban pynthymmai bad ka baiwai lah buh ha ka dor kaba rit bha. Ula pynbna ruh ba ka Iingmane bad ka Lum Jingtep kin lait na ka jingsiew baiwai haba bthah ia u Deputy Commissioner ba un bud ia ki kyndon treikam ha kaban ai ia ki jaka sha kine ki shnong.
Ka jingpynbeit ia ka jingkyntu ia ki jaka Sorkar hapoh sor Tura, West Garo Hills, ka dei kaba la sdang ha u snem 2023-24.
Ka Kynhun Myntri kaba long ha ka 26 tarik Naiwieng 2025, kala ai jingmynjur ia ka jingshong shnong ha ka jaka Sorkar hapoh ka sor Tura, ha ki 8 tylli ki shnong sha ki 754tylli ki Longiing kiba don ha ka jaka bah eh 149.5 acres lane 452 bigha.
Ka map jong kine ki 8 tylli ki Shnong bala iapynbeit ia ka jingkyntur pud la pynkhreh lynba ka sorjamin lang bala pynlong da ka Tnad Revenue, ka Ophis u Deputy Commissioner, Tura, District Urban Planner, District Urban Affairs Unit, Tura, ka DPMU-West Garo Hills bad MBMA.
Kine ki phra tylli ki shnong ki dei – Dakopgre Ronggi Songgital, ITI Upper Matchakolgre, Meghalaya Survey School locality, Sepoy Colony DC office locality, Deringgagre locality, Chinap Aslang locality bad Nikwatgre locality.
Kat kum kane ka kot pata, ka Sorkar kala buh ban aiwai 30 snem bad ka jaka ba hehduh kaba la ai sha kawei ka longiing kan long 0.69 bigha lane 10,000 sqft. Ka dor baiwai kaba la buh da ka Sorkar ka long T.2000 shi bigha ha ka shisnem bad la ailad ia kine ki longiing ba kin siew hapoh ka 3 instalment.
