Shillong, Nohprah 11 : U Myntri ba khmih ia ka Water Resources Bah Metbah Lyngdoh ula pynbna ba ka Sorkar Jylla kala ioh pdiang ia ka song pisa ba T.51 klur na ka Sorkar Pdeng kum shibynta na ki jingsiew ia ki project Water Resources ba dang iaid, haba pynpaw ba kadei kum ka jingai sngewbha ban lehkmen Khristmas.
“Ngi la ioh pdiang ia katto katne ka song pisa na ka Sorkar Pdeng, kaba dei ka bhah ka Sorkar Pdeng, kaba kot haduh T. 51 klur tam, ia kaba ka bhah ka Sorkar Pdeng ka kot kumba T. 5 klur tam” ong u Bah Metbah.
U Myntri ula bthah ia ka Tnad ba kan pynsted kloi ha kaban pynlut bad pynlait ia ka pisa sha ki contractor khlem ka jingpynslem. “Nga la bthah ia ka Tnad ba ngi donkam ban pynsted ia ka jingpynlut bad pynlait ruh ia baroh ka pisa sha ki contractor khlem ka jingpynslem, khnang ba kin lah ba kin sdang ia ki kam naduh mynta ka sngi bad kin don ha ka kam” ula ong.
U Bah Metbah ula pynpaw ia ka jingkyrmen ba ka Sorkar Pdeng kan sa nang pynlait shuh shuh ia ka song pisa bad kular ba ka Sorkar kan sa pyntreikam bha ia kane ka pisa ba ka ioh. “Ka Sorkar India ka kwah eh ban pynlait shuh shuh ia ka song pisa, bad ngin pynthikna ha kaban pyndonkam lut ia kane ka pisa khnang ba ngin ioh pat sa ia kawei ka song” ula ong.
U Myntri ula ban jur ia ka jingdonkam ban iai buddien bad ka Sorkar Pdeng ha kaban lah pynioh ia ka song pisa ba dang sah.
