Agartala, Nailur 19: Ka seng jong ki kynhun enjiniar ka jylla kala dawa pan mab paidbah na u symbud lamphang (deputy speaker) ka iingdorbar thaw ain ka Tripura u Biswa Bandhu Sen halor ki jingkynthoh pyrshah ki jong u ia baroh ki enjiniar.
Haba pynpaw halor kane, ka kynhun ki seng jong ki enjiniar kaba la don mynta lah 30 snem kynthih kala dawa ia ka jingtuklar lem jong u Myntri Rangbah (CM) ka Tripura u Dr. Manik Saha bad u Dy.CM u Jishnu Dev Varma halor kane ka bynta.
Utei u Dy.speaker ula pynmih ia ka jingkren kynthoh ha kane ka sngi Balang ba la lah ha ka por ba ula aijingkren ha ka jingialang ha Dharmanagar ha Tripura.
Da kaba kynthoh pyrshah ia ki enjiniar jong ka tnat RD bad tnat bording, utei dy. speaker ula ong; “Ki katto katne ki enjiniar kiba don hapoh ka tnat PWD bad tnat Bording kila iai pyrshang ban pynthohbria ia ka sorkar jylla.Ngi la ioh pdiang khah khah ia ki jingujor kiba iadei bad ki jingdkoh ha kaba ai jingshakri na ka bynta ki jingdonkam jong ki paidbah kumjuh hapoh ka tnat bording.Hynrei, lada ka BJP kan wan ha ka bor ha u 2023 ha ryngkat ka jingbun paid ia kiba kum kine ki jingiasylla yn ym lah ban shah da lei lei ruh.
Hynrei, kane ka jingkren ka jong u kala wanrah ka jingpynpaw pyrshah na ka kynhun seng ki enjinar ha Tripura kiba la ong ba kane ka jingpynpaw jong u deputy speaker u Biswa Bandhu Sen ka long mar khongpong bad ka jingpynpaw jong ka sorkar.
“Ha ka por ba la rakhe ia ka sngi jong ki enjiniar ha kine ki khyndiat sngi ba la dep, na ka liang u CM ka jylla, u Dr Manik Saha bad u deputy CM u Jishnu Dev Varma kila pyrto halor ka jingtrei borbah jong ki enjiniar ka jylla na ka bynta ban pyniaid shaphrang ia ki projek jong ka sorkar.La ka long ha kaba iadei bad ka jingpyniaid shakhmat ia ka Pradhan Mantri Awas Yojana, kaba dei ka projek kam bording kaba dei ka jingphohsniew jong u Myntri Rangbahduh (PM) ka ri U Narendra Modi, ia ka skhim kam bording bad kiwei pat, na ka liang ki enjiniar kila trei borbah ban pynlong kaba jop,” ong ka jingthoh ba la pyllait da ka sorkar.
Shuh shuh katei ka seng kala ong ruh ba ym tang ki enjiniar kiba trei ha ki tnat bapher bapher, hynrei wat ki samla pule enjiniar ha ki lain bapher bapher kila pynpaw ka jingsngew bynniaw kaba jur ha kaba iadei bad katei ka jingkynthoh.
