Shillong, Nohprah 11 : U Myntri Rangbah ka jylla Conrad K Sangma, ha ka sngi Palei, ula plie ia ka jingsdang jong ka samoi pule ne Academic Session 2025–26 jong ka Pahamsyiem Eklavya Model Residential School (EMRS) kaba don ha Pahamsyiem, Ri-Bhoi District bad ula buh ruh ia u Mawnongrim ban tei ia ka Synthetic Athletic Track ha Chinchona, Pahamsyiem, Nongpoh.
Ha kane ka sngi la iadonlang u Myntri ka pule puthi Bah Lahkmen Rymbui, u Myntri ka kam ialehkai Bah Wailadmiki Shylla, u Myntri ka tnad Community & Rural Development Bah Sosthenes Sohtun bad kiwei kiwei ki kynrem ki lyndan.
Haba ai jingkren u Myntri Rangbah ula pdiang ia ki samla pule kum ki kongsan ba shisha ne “true chief guests” jong ka prokram.
“Kane ka prokram ka dei ka jong phi katba ha ka thup prokram kala thoh ia ngi ban ngi dei ki kongsan bad symbud kongsan, hynrei mynta ka sngi phi dei ma phi ki kongsan kiba shisha”.
Ula pynpaw ia ka jingsngewhun ha ka jingplie paidbah ia ka samoi pule jong ka EMRS kaba nyngkong ha Pahamsyiem bad ula ai khublei ia ka Ministry of Tribal Affairs, u Myntri Rangbah duh ka ri bad u Myntri ka Tnad Tribal Affairs kiba la ai ia ka jingkyrshan haba ong, “Nga ai khublei kyrpang ia ka jingai jingkyrkhu ia ki khynnah pule da kaba ai ia kane ka kabu bad ia ka jingtei”
“Ka pule puthi ia ngi, kam dei eh thik tang shaphang ka jinghikai, ki kot pule ne eksamin, ka dei shaphang ka jingtei ia ka lawei jong ka jylla, ban saindur ia ka jinglong bad ban ai ia ka nongrim kaba kordor kaba lah ban tei ia ka imlang sahlang kaba khraw” ula bynrap haba ban jur ba ka jingkhein kaba shisha ia ka pule puthi ka dei halor ka jingioh ki samla ia ka kyrdan bad ka jingdon burom ka jong ki.
“Jan kumba 2,000 ngut ki samla pule ki lah aplai bad tang katto katne eh kiba la shah jied. Nga kyntu ia baroh ban khein kordor ia kane ka kabu, ban trei shitom bad minot thop ha ka jingpule bad ban pdiang ia ka jingnang jingstad kaba phi ioh nangne” ula ong.
Ha kaba iadei bad ka Synthetic Athletic Track, ula ong ba ka sorkar ka iengskhem ban ai ia ka roi ka par kaba salonsar.
“Ka rukom iaid ka jong ngi ka long kaba salonsar, ka roi ka par kadei ia baroh ki thain, jaidbynriew bad ki shnong ki thaw. Kam dei kaba ngi shu jied bad nga kyntu ia baroh ban iaid shaphrang khlem da don ia kino kino ki bynta jong ka jingiaphiah bad jingiapait iapra bad ban iaroh ia ka jingiaid shaphrang ki kam ia kaba la leh ha kylleng jongka jylla”.
Ula pynpaw ruh ia ka jingiohi jngai ka jylla ha kaba iadei bad ki kam pynroi bad ai jingbatai ruh shaphang ka jingiaid shaphrang ka Meghalaya da kaba ong, “Nga sngewsarong ban ong, ba ka Meghalaya ia mynta hi, kadei kaba wan baar ha ka jingkiew sted ka ioh ka kot ha ri India, kaba don ia ka jingkiew ba shisha jong ka GDP kaba 10% man la ka snem ha kine ki 3 snem kiba la leit”.
Ka Synthetic Athletic Track project kadei kaba la pyntrei da ka State Sports Council Meghalaya, da ka jingthmu ban kyntiew ia ki jaka ialehkai ha Ri-Bhoi District bad ban ai sha ki nongialehkai kiba dang khynnah ia ki jaka pyntbit kaba biang.
Kum shi bynta jong ka prokram, u Myntri Rangbah ula pyllait ruh ia ki 4 tylli ki kali hapoh ka Aajeevika Grameen Express Yojana (AGEY), kaba la pyntreikam da ka District Rural Development Agency (DRDA) hapoh jongka MSRLS.
Kitei ki kali kidei da ka jingthmu ban kyntiew ia ka leit ka wan bad ban kyrshan ia ka lad kamai kajih na ka bynta ki self-help group ha ka district.
La pynkut ia kane ka prokram da ka jingpyninam ia ka kolshor da ki khynnah pule jongka EMRS.
 kaba don ha Pahamsyiem, Ri-Bhoi District bad ula buh ruh ia u Mawnongrim ban tei ia ka Synthetic Athletic Track ha Chinchona, Pahamsyiem, Nongpoh.){kind=link}