Itanagar, Nnohprah 11: Ki Pulit kila kem noh ia ar ngut ki briew halor ka jingshah kynnoh ba kidei ki nongsyntiat jong ka Pakistan na ka jylla Arunachal Pradesh.
Ia kine ki ar ngut la tip kyrteng kum u Nazir Ahmad Malik bad u Sabir Ahmed Mir, kine baroh ar ngut kidei na ka shnong Kupwara jong ka Jammu & Kashmir, bad ia kine la kem ha ka 21 tarik u bnai Naiwieng hadien ba ki pulit kila ioh ia ka jingtip ba tikna ia ka jingdonkti ka jong ki ha ka kam syntiat.
Ia u Nazir la ioh kem nyngkong na ka shnong Ganga, bad haba pynshong nongrim katkum ka jingtip ba la ioh pdiang ia ki jingtip ba u la pynbiang, ia u Sabir Ahmed Mirla ioh ban kem na Abotani Colony ha kajuh ka sngi.
Katkum ki report, kine baroh ar ngut kila ai ia ka jingtip shaphang ka jingiaid ka jingieng jong ki shipai ha Arunachal Pradesh bad ki nongpyniaid jong ki lyngba ka Telegram channel.
Ki pulit ki tih bniah bha ia ka jingtohkit bad ki khmih lynti ba kin dang don shuh shuh ki jingshah kem ha ki sngi ban wan.
“Kane ka dei ka case kadei kaba sngewkhia bha bad ka dang dei tang ka jingsdang jong ka jingtohkit.Ngi pan ka jingiatreilang na ki paidbah”, la ong uwei u heh pulit.
Katkum ka report, kine baroh ar ngut kila ju wan barabor hapoh ka jylla Arunachal, la iathuh ba ki wan sha katei ka Jylla, la katto katne snem, ban die jain, katba ki leit sha kylleng ki District bapher bapher.
Kaba sngewkhia ka long ba ki lah leit sha ki jaka ba shakhmat kum ka Kibitho, Anini, bad Tezu, ha kaba la kynnoh ba ki la lum ia ki jingtip kiba kongsan na ka bynta ki nongpyniaid jong ki.
Ki pulit kila iathuh ha ka por ba ki pynlong ia ka jingtohkit, u Nazir Ahmad Malik u la iathuh ia u nong tohkit ba ia u la pynrung na ka bynta ban leh ia ka kam syntiat da u Sabir Ahmed Mirla na ka bynta ka jingmyntoi ban ioh pisa.
Baroh ar ngut kila wan hapoh ka jylla ha u bnai Iaiong mynta u snem bad kila sdang ia ki kam lum jingtip.
