Shillong, Naiwieng 11: U Myntri Rangbah ka Jylla u Conrad K Sangma, hynne ka sngi Palei, ula leit jurip ia ka jingshna ia ka Mawkhanu Football Stadium kaban dei ka Stadium kaba heh tam hapoh ka ri.
Ha kane ka jingjurip la iadonlang u Myntri ka tnad Sports & Youth Affairs u Bah Wailadmiki Shylla.
U Myntri Rangbah ula ong ba ka Mawkhanu Football Stadium kan dei ka jingtei kaba donnam bad ka ong, “Ka Meghalaya kadei ka jylla kaba ieid ia ka football bad kane ka jingtei kan long ka lad bad kan kyntiew ia ka kam ialehkai khamtam eh ha ka liang ka football.”
U Myntri Rangbah ryngkat bad kiwei pat ki heh ki hain kila theh dew bilat ha ka bynta jong ka jingtei ia ka North Stand jongka stadium bad na ka liang u Fr Richard Majaw kum ka dak jongka jingsdang ia kane ka jingtei ula buh jingduwai bad ban ioh ia ka jingkyrkhu na u Blei.
