Shillong, Nohprah 10 : Ka Iingkashari Meghalaya High Court kala ai jamin ba shipor ia u samla pule Law ba shah kynnoh leh kynshlein ia kawei ka Kynthei ha kawei na ki tamasa ha Shillong myn ha ka 19 tarik Naiwieng, 2025.
Ka Iingkashari kala bthah ia une u nongshah kynnoh ba un ai ka jingiatreilang ha ka jingtohkit bad ba um dei ban pynjot pynjulor ia ki sakhi ne ban iakren bad ka nongkynnoh.
Ia kane ka case la ujor hapoh ka kyndon 64(10 jong ka Bharatiya Nyaya Sanhita (BNS), 2023, ba kynnoh ba kane ka kynthei kala shah leh kynshlein katba ka dang thiah jah thait ha ka kamram jong ka Arunachal Boy’s Hostel.
Une u Nongshah kynnoh ula leit tied ia ka jingkhang ka Iingkashari hadien ba ka Iingkashari Session Judge, Shillong kala kyntait ban ai bah jamin lypa ia u.
“Kumba la kyrpad, ia mynta, une u nongaplai la shah ba un leit da ka jamin ba shipor. Hynrei, um dei ban jah rngai lane pynjulor ia kino kino ki sakhi bad um dei ruh ban iakren bad ka nongkynnoh katba dang iaid ka jingtohkit. U dei ruh ban iatreilang bad ka kynhun tohkit haba donkam ia u” ong u Justice W Diengdoh ha ka hukum ba pynmih ha ka sngi Balang.
Ka Iingkashari kala bthah ia u Investigation Officer ba un aiti ia ka case diary ha ka sien shong bishar ban wan, kaba la buh ba long ha ka 16 tarik Nohprah.
