“Ngin iada, pynneh pynsah bad kyntiew iala ki jingleh tynrai”: Conrad
Shillong, Nohprah 10: U Myntri Rangbah ka jylla Conrad K Sangma ha ka sngi Balang, ula pynpaw ia ka jingkongsan ban pynneh pynsah bad ban kyntiew ia ka jingriewspah ka kolshor u barim bajah.
U Conrad ula kren ia kane ha ka jingplie ia ki jingtei pynitynnad kiba iadei bad ka kolshor bad kam jngohkai na ka bynta ka jingshad Nongkrem ha Lum Pomblang bad ha Madan Syiem, Smit.
U Myntri Rangbah ula ong ba ka long kaba kongsan ban pynneh pynsah bad ban kyntiew ia ka kolshor naduh hyndai hynthai bad pynpaw ba ha ka jingleit ha ka sien kaba nyngkong ha kine ki 3 snem shiteng kiba la dep, ula sakhi ia ka jingriewspah jong ka lehniam lehrukom jong ka shad Nongkrem.
Ula pynpaw ba wat hapdeng jong ki phew snem jong ka jingioh ia la ka jong ka jylla, ka jingithuh pura ia ka jinglong tynrai ki kolshor jong ki paid riewlum kam dei satia kaba la pynneh pysnah pura bha.
“Nga kren ia kane ym kum ka jingkynthoh hynrei kum ka jingpynsngew. Ha katei ka khyllipmat. Nga don ia ka jingsngew ba ia kane donkam ban pynkylla. Nga la iengskhem ba ngi ngin leh ia kaei kaei kaba donkam ha kaban leh ban ai ia ka burom ia ka riti dustur bad koslhor, ban iaida, pynneh bad ban kyntiew ia ki” ula ong.
U Myntri Rangbah ula pynpaw ia ka jingkmen ban sakhi ia ka jingseisoh ha kaban shna pyndep ia ka projek bad kdew ba ki kam pynroi kiba la leh nalor jong ka madan shad, ryngkat ka jingpynitynnad ha ki jaka kiba marjan ruh ka dang iaid kaba kynthup ia ka Madan Syiem bad kiwei kiwei ki madan ha katei ka shnong.
Haba iengskhem ha ka jingshim rai ka sorkar, kadei kaba la lamkhmat na ki jingdonkam, jingiahap tarajur bad ka jingbym ia shah liang bad ula pynpaw ba ka jingiai bteng ban pynpoi ia ka jingai jingshakri ha kine ki 7 snem shiteng kiba la leit sha baroh ki shnong kiba don ha kylleng ki thain bad ia ki niam bapher bapher.
Ula kren ruh shaphang ka jingiapait iapra ha ka imlang sahlang bad ula kyntu ia ki paitbah ba kidei ban iaid shakhmat da ka jingiatylli lang.
“Ia ka jylla ba kan kiew shaphrang ha ki kam pynroi, ngi hap ban iaid shakhmat da kaba iatylli lang kawei bad kaba long salonsar, ban pynthikna ba ki kam pynroi kin ai jingmyntoi ia baroh” la ong u Myntri Rangbah bad ka banjur ba ka jingkiew ka roi ka par dei ban thew da kaba jingktah ka jongka ia ka jingim jong ki paitbah.
Haba pynshlur ban pynlong ia ki prokram kiba iadei bad ka kolshor, u Myntri Rangbah, ula ong ba kum kitei ki sienjam kin pyninam ia ka jingdon kyrhai jong ki jaidbynriew jong ka Meghalaya, kan kyntiew ia ka kam jngohkai, kan pynkhlain ia ka ioh ka kot ha ki shnong ki thaw bad ban pynneh pysnah ia ka jingriewspah ka kolshor barim bajah. Nalor kane ula pynpaw ba ka sorkar ka iengskhem ban iai bteng ban kyrshan ia ka koit ka khiah, ki kam ialehkai bad kiwei kiwei ki bynta.
Ha kane ka prokram la iadonlang u Symbud Myntri Rangbah ka jylla u Bah Prestone Tynsong, u Syiem bad ka Dorbar jongka Hima Khyrim, ki nongialam ka thain kaba kynthup ia ki Longsan Mansan, Sordar bad ki Rangbah Shnong.
Haba ai jingkren u Symbud Myntri Rangbah u Bah Prestone Tynsong ula pynpaw ba kane ka sienjam ka pyni shai ia ka jingkular u nongialam na ka bynta ka raoi ka par kaba salonsar bad ka jingkiew shaphrang.
Ula pyntip ha ka jingialang ba ka sorkar ka don ia ka jingthmu ban pynitynnad ia ka Iewduh Market ban pynsuk ia ki paitbah bad ia ki briew kiab wan nabar.
Ha kane ka prokram la pyninam ruh ha kaba iadei bad ka kolshor bad ka jingioh ia ki jingpynbyrngia na ka kynhun tem jongki khynnah pule ka Smit Higher Secondary School bad Smit College.
