Shillong, Nohprah 7 : U Myntri ka Textiles Giriraj Singh ha ka sngi saitjain ula plie paitbah ia ka Integrated Textile & Tourism Centre (ITTC) ha Nongpoh, Ri Bhoi district bad pynbna ban tei sa ia ka Weaver Service Centre (WSC) bad ki sienjam ban pynioh kamai ia ki nongthain jain ka Meghalaya bad kot sanphew hajar shibani.
“Ka Northeast ka dei ka jingsarong ia ka pateng thain jain ka India. Ka dei ka jaka jong u muga, eri bad ka rukom thain jain ba ni kti. Hapoh ka jingialam u Myntri Rangbah duh Narendra Modi, ngi la kut jingmut ban pynkhlain ia baroh ki lad pyniasoh ba iadei bad ki jain ba pynmih na ka thain naduh ka por ba ri ia u khniang ryndia haduh ban poi sha ki kew ka pyrthei” ong u Singh uba la plie ruh ia ka EKTA Meghalaya (Exhibition cum Knowledge Sharing for Textiles Advantage).
U Giriraj ula pynpaw ruh ia ka jingkut jingmut jong ka Sorkar ban tei ia ka sawdong sawkun ka ba khlain ha ka jingpynmih jain bad ri khniang ryndia ha ka thain Shatei Lam Mihngi.
Ula pynbna ia ka jingseng ia ka Weavers’ Service Centre (WSC) ha Meghalaya, bad ong “Ha Guwahati, ka Weavers’ Service Centre ka dei ka jakaba kongsan ba ai ia ki jinghikai shaphang ki jingpynwandur (design) bad ki jingdonkam ban pynmih ia ki jain kiba bha. Ia mynta, ngi dangdon tang kawei kaba kum kane ka centre ha ka thain. Ngan sa buh noh kawei kawei ha man ki Jylla-ka ban sdang na Meghalaya hadien ba ngi ioh jaka na ka Sorkar Jylla”.
U Giriraj ula pynpaw ruh ia ka jingsngewskhem ba ka thain Shatei Lam Mihngi kan kylla longka jaka iadie iathied kaba heh bha. “Na Guwahati, ka shimpor tang shikynta ban poi sha ka jaka ba pynmih ia ki ksai muka ba nylla. Kane ka dei ka jingkhlain ba kham pher jong ka thain” ula ong
Haba kren halor ka jingshimkhia ka Ministry ban pynleit jingmut ha ki kam ki ban ai kamai jakpoh, u Giriraj ula ong “Ka thong jong nga ka long ban pyniasoh ia baroh ki nongthain jain ba kin ioh kamai haduh sanphew hajar shibnai-kane ka dei ka ‘Pachlakhia Didi’ model jong ngi. Ngi la pynkhreh ia ka lynti iaid bad nginsa pyntreikam hangne ha Meghalaya da ka jingkyrshan kaSorkar Jylla”.
Une u Myntri ula iakren ruh bad ki master weaver bad ki nongpynmih jain na ka thain, kiba la pynpaw ia ka jingsngewnguh ia kane ka jaka treikam haba pynpaw ba ka ITTC kan iarap ia ki ba kin ioh ia ki jinghikai, ka jingkyrshan ban ioh ia ki mar bad ka lad ban lah pyniaid iew bha ia ki mar.
U Myntri ula pynpaw ba ka ITTC kan shakri kum ka rynsan ban ai jinghikai, pynwandur ia ki mar, ka jingsain ia ki ksai muka, ka jingpynmih ia ki mar bapher bapher bad kumjuh ruh ha ka kam jngohkai, ka ban pynlah ia ki nongthain jain ka Meghalaya ba kin ioh ia ki lad ki kabu ban pynpoi ia ki mar jong ki sha kylleng ki jaka ka ri bad shabar ri ruh kumjuh.
U Myntri ula pynbna ruh ia ki jingpyrshang ba thymmai ban kyntiew ia ka ioh ka kot ki nongrep. “Mynta ngi iakren ban pynmih na ki artylli ki ksai muga sha ki lai tylli, bad ki nongrep kin ioh arshah ia ka kamai. Shi acre ka jaka ka lah ban pynmih haduh 4-5 lak tyngka da ka rukom ri khniang ba paka. Ka Central Silk Board bad ka State Sericulture Department kin iatreilang ban pynurlong ia kane”.
Kiwei pat kiba la ai jingkren ki kynthup ia u Mynyri Khynnah ka Textiles Pabitra Margherita, u Myntri ka Tnad Textile ka Jylla Bah Metbah Lyngdoh, u Principal Secretary ka Tnad Textile ka Jylla Bah
Frederick Kharkongor, bad kiwei kiwei.
 ha Nongpoh, Ri Bhoi district bad pynbna ban tei sa ia ka Weaver Service Centre (WSC) bad ki sienjam ban pynioh kamai ia ki nongthain jain ka Meghalaya bad kot sanphew hajar shibani.){kind=link}