Byrngem ka HYC ban kyndang lut ia ki nongkhaii droks bad ki nongsah beain ha Lum Survey

Shillong, Nohprah 05: Ka Hynniewtrep Youth Council (HYC) kala byrngem ban leh da kaba tyngeh ban pynduh jait ia ka jingkhaii droks be-ain bad ban kyndang ia ki briew ba sah be-ain ha Lum Survey, lada jia ba ka sorkar jylla kam leh eiei.

“Lada ka sorkar bad ka Defence Estate Office ka iai bteng ban kyntait ia kine ki jingsngewkhia kiba kongsan, ka HYC kan shim ia ki sienjam haduh ba man la ki nongshong be-ain kin shah pynkhuid bad la pynduhjait shi syndon ruh ia ka jingkhaii droks ha Lum Survey. Ka jingbym leh eiei ki bor kiba dei khmih ka long kaei kaei kaba bym iahap satia. Ki Samla bad ki nongshong shnong ka jylla ki donhok ban ioh ia ka jingiada bad ka nongbah Shillong kadei hok ban ioh ia ka lawei kaba khuid, ym ia ka ktem ban leh ia ki kam be-ain” la ong u President ka HYC u Bah Roykupar Synrem ha ka kyrwoh kaba la phah ha ka sngi Palei.

Ula ong, ba ka HYC ka dap da ka jingbitar ia ka jingpulom ka sorkar ban shimkhia ia kane ka mat jong ka jingsah be-ain ha Lum Survey kaba la kylla long kum ka ktem ban leh ia ki kam sniew kynthup ia ka jingkhaii droks.

Ka HYC kala kynnoh ruh ba ki bor kiba dei khmih kila leh klet ia la ka kamram, da kaba ailad ia katei ka thain ban kylla long kum ka ktem bad ka jaka riehtngen jongki nongleh kam sniew.

“Haba ki bor kiba dei khmih ki leh kum bym iohi, ki nonglehkam sniew kila nang khlain. Ka Lum Survey kala long ka sakhi halor ka jingpulom jong ka sorkar” la ong u Bah Synrem.
“Sa katno ngut ki samla kin dang kylla long ki langknia ha u droks, hashwa ba ka sorkar kan plied ia ki khmat ki jongka? ula buh jingkylli bad ka banjur ba u droks u buh ha ka jingma ia ka jingshngain jong ka jylla bad ki nongshong shnong.

Ka HYC kala dawa ba ki bor kiba dei khmih kidei ban shim noh mardor ia ki sienjam ban shimkhia ia katei ka mat bad ban pynthikna ia ka jingshngain bad ia ka bha ka miat jong ki nongshong shnong ha Shillong.