Shillong, Nohprah 05: U Director ka tnat Civil Defence & Home Guards u MK Sangma u la ong ba ïa ka jaka hikai jong ka Jylla ka Central Training Institute of Civil Defence and Home Guards kala shah jied kum kawei na ki 17 tylli ki CTI ha ka ri ban pyntreikam ïa ka skhim ka Sorkar Pdeng naka bynta ka Training and Capacity Building ka Civil Defence.
34 ngut ki Master Trainer ki la ioh jinghikai ha ka Phase I jong ka skhim kaba kynthup ia 16 ngut ki Master Trainer na Tripura bad 2 ngut na Mizoram nalor 18 ngut ki Master Trainer na Meghalaya.
Haba kren haka 63rd Raising Day jong ka Civil Defence & Home Guards, u Sangma u la kdew ia ki jingkiew kiba kongsan, ba kynthup ia ka jingbuh ia ki kor pynsawa (Air Raid Siren) ha kylleng ki district ka Jylla bad sha ki Sub Division bad Block Level hadien bala ioh jingmynjur ban thied ia ki Air Raid Siren hapoh ka Preparedness and Capacity Building Sirens jong ka CB SDPS.
U Sangma la bynrap ruh ba ki ophis jong ka Civil Defence ha ki 7 tylli ki district jong ka jylla, ki dang trei ban hikai ia ka kynhun kaba 4 jong ki Civil Defence Volunteers bad Warden hapoh ka Phase II jong ka Central Sponsored Scheme kaba don ka thong ban ai jinghikai haduh 360 ngut ki CD Volunteers bad Warden ha kaba kut jong u bnai Nohprah.
U la pyntip ruh shaphang ka jingpyndep hok ïa ka jingpynrung kam na ka bynta ki 445 tylli ki kam kynthup ki Sub-Inspectors, Guardsmen, Drivers bad Non-Combatant Staff.
U Sangma u la pyntip shaphang ka jingmynjur jong ka Sorkar ha kaba pynbeit thymmai ïa ka SDRF bad Border Wing Home Guards (BWHG) kum ka kynhun shipai treimon sngewbha kumba la mynjur da ka MHA, ban pynkhlain ïa ka jinglah jong ka Jylla ban ïakhun pyrshah ïa ki jingjia ba sngewsih.
Ka jingpynkylla ia ki 708 tylli ki kam bala mang jong ka Border Wing Home Guards Battalion sha ki ar tylli ki Battalion jong ka SDRF kaba kynthup ia 304 ngut kum ha ka 1st SDRF Bn kaba don ha Shillong ban peit iaka Eastern Range bad ka 2nd SDRF Battalion kaba don ha Tura naka bynta ka Western Range.
U Director ka tnat Civil Defence un peit iaka SDRF kum u Inspector General bad u Joint Director ka tnad Civil Defence ban iarap u kum u Dy. Inspector General of SDRF.
La pynksan ruh ia ka jingdonkam ban pynbha ia ki jingtei (Infrastructure) bad thaw iaki kyrdan ban ïalam kum ki sienjam kiba kongsan ban tei ia ka bor jong ka tnat.
Ha kaba ïadei bad ki jingtei (Infrastructure) u Director u la bynrap ba ka tnat dang ïai bteng ban shna bad pynbha ïa ki jaka treikam bad ki jaka ai jinghikai ha kylleng ka jylla, kynthup ka ophis treikam thymmai na ka bynta ka Civil Defence & Home Guards ha Jowai, ka ban long kum ka Centre jong ka rilum Jaintia.
U Director u la ong ba ki jingthmu ki dang iaid ban tei ia ka iing ophis jong ka tnat Directorate of Civil Defence and Home Guards ha Mawkasiang namar mynta ka kynti kane ka ophis ka treikam na Horse Shoe Building kaba don ha Lower Lachumiere.
U la ban jur ia ka jingdonkam jong ka jinghikai ha ka imlang sahlang, ka jingpynsngewthuh bad ka jingshim bynta lang ki paidbah naduh ki samla pule, ki nonghikai, ki seng treimon sngewbha, ki heh Sorkar ban tei ia ka imlang sahlang kaba lah ban ieng tylli haki por ba donkam kyrkieh.
U MK Sangma u la pynshlur ïa ki nongïalam shnong, ki Dorbar Shnong, ki Nokma, ki jaka treikam tynrai, ki seng treimon sngewbha bad ki seng kiba pynshong nongrim ha ka jingngeit ban long ki paralok ha ka jingthmu ban tei ïa ka imlang sahlang kaba lah ban ïakhun bad kyntu ïa ki nongtrei mon sngewbha ban kynmaw ba haba ki ïashim bynta ha ki jinghikai jong ki Home Guard, ki don ka bynta ban shakri ïa ka jylla bad ka jaidbynriew.
La rakhe iaka 63rd Raising Day jong ka Civil Defence & Home Guards lyngba ka jingshim Salute u kongsan bud sa ka March Past jong ki 4 tylli ki kynhun kata 1 Platoon na ki Border Wing Home Guards, 1 Platoon na ka Central Training Institute ryngkat ki Brass band bad Pipe band ïa kaba la ïalam da u John Kennedy Diengdoh, Deputy Controller ka Civil Defence, East Jaiñtia Hills, Khliehriat kum u parade Commander bad u Mark A Thubru, Inspector, District Training Centre, West Khasi Hills District, Nongstoin kum u parade 2nd In-Command.
Ha kane ka sngi la pynkup burom daka President’s Meritorious Service Medal da u Director ka tnad Civil Defence & Home Guards sha u Prafulla Basumatry, Havildar, Border Wing Home Guards Bn. Shillong.
U Director u la ai ruh ïa ka khusnam DG Disc & Commendation Certificate New Delhi, 2024 (Gold, Bronze, and Silver) sha ki 5 ngut ki nongïoh ban burom ïa ka jingshakri ba kyrpang, ka jingaiti lut, bad ki jingnoh synniang ba radbah jong ki sha ka tnat.
