Shillong, Nohprah 04: Ka Champion ka Super League Shillong Lajong FC bad ka Champion ka 1st Division Nongkseh SS&CC kila pyni ia ka jingiaryngkat bor kampher watla ki dei ki club kiba iakhun hala ki jong ki kyrdan-kham khraw ka Shillong Lajong hynrei haba poi ka khep ban iakhun, ki Champion te ki Champion hi bad ka eh ban pyniapher kawei ia kawei pat.
Ia kane la sakhi ha ka jingiakhun hapdeng kine ki Champion ha ka lympung SSA Champion Cup kaba long hynne ka sngi Palei ha madan Polo, kaba la kut hapdeng ka jingiakhaid ba mar shi kol.
Ka madan SSA 1st Ground kala dap snam ha ki jaka shong peitkai bala plie da ka SSA, da ki nongwan peit phutbol bad ki nongkyrshan kiba la wan ban sakhi ia ka jingiakhun ki champion.
Kane ka jingiakhun ka dei jong ka Group B, bad ki rang ialehkai kiba la khie la san bha ha ka jingim ialehkai, ha baroh ki 90 minit jong kane ka jingiakhun, kila pyni ia ki sap ialehkai kiba itynnad bad kiba iakhaid bha.
Haba phai sha ka jingthep ia ki kol, dei ka Nongkeh kaba la ioh ia ka kabu ksiar ban pynkhih nyngkong ia ka jar, lyngba u Kynsaibor Lhuid (67’), bad ka Lajong ka la ioh ba kan pynphai pat ia ka lyngba u Deibormame Tongper (76′).
Kumban shu pynkynmaw ba ka Nongkseh naduh ba ka mih ialehkai ha ka samoi bala lah ha 1st Division, kala khur ia ka nam jop ba 11 sien lynter khlem ka nam rem bad kat haduh mynta ka dang iai bteng ban pynneh ia kane ka kam khlem shah rem haduh ka lympung Champions Cup.
Kane ka jingiakhaid kala biang pura ia kane ka kynhun kaba la coach da u Bah Richard Nongneng ba kan buh jaka ialade sha ka kyrdan iakhun jong ka semifinal jong ka lympung.
Ka Shillong Lajong ruh kala buh jaka lypa ialade sha ka semi, bad kan dei ka sien kaba 15 sien lynter ba kan iaid lyngba khlem da shah rem, naduh ba sdang ka Shillong Premier League, SSA Super Cup bad mynta ha kane ka Champion Cup, bad hynne ka janmiet kan dei ka sien ba nyngkong ia kine ki ar kynhun ba kin shah thep kol.
Hynrei shwa ia kane ka jingiakhun, ka kynhun ialehkai ka MLPFT ka la lah ba kan pynliem ia ka Mylliem Lum da 3-0, ban nang pynskhem shuh shuh ialade ban iai neh ha ka kyrdan ba nyngkong ha ka Group A.
Napdeng kine ki lai tylli ki kol, ar tylli na kine la thep ia ki da u Chesterfield Nongdhar (3’, 54’) bad sa shi kol la thep da u Balmingstar Lyngkhoi (36’), kaban pynlong ia kane ka kynhun ban khur mynta 10 point.
Lashai ka sngi kan don tang kawei ka jingiakhun kaban long hadpeng ka Mawlynrei pyrshah ia ka Laitkyrhong kaban long ha ka por 2:30 mynsngi.
