Tura, Nohprah 04 : Ki Pulit ka West Garo Hills kila pynmih ia ka jingbthah ba pynbna ia ki jingpyrrkhing iaid kali ha Tura namar ka jingpynlong ia ka Megong Festival 2025, ka ban long ha ka 5 bad 6 tarik Nohprah ha Bolbokgre-Watregre.
Ia kane ka jingpyrrkhing la pynmih namar ka jingantad ba kan don ka jingwan tuid kaba bun bah ki briew sha kane ka tamasa, khnang ba ka iaid ka ieng ki nongleit nongwan sha ka tamasa kan long kaba iaid beit iaid ryntih.
Kat kum kane ka jingbthah, ka jingiaid kali ha ka thain Jengjal bad Bolbokgre-Watreigre la pyrrkhing bha bad la buh kyrpang ia ki jaka pynieng kali ban pyndonkam ia kiba wan tamasa, Ka jingpynieng kali kulmar sha ki jaka ki bym dei kan lam sha ka jingshah dain kuna.
La khang ia ki kali heh bad ki trok ba kin iaid ha ka surok NH-51 hapdeng ka Anogre bad Tura naduh ka por 8 baje mynmiet jong ka 4 tarik Nohprah haduh ka 6 baje mynstep jong ka 7 tarik Nohprah.
Ki Pulit kila pynbeit ruh ia ki lynti iaid ia ki nongleit nongwan sha ka tamasa :
Ki nongshongshnong ka SWGH bad Mankachar (ASSAM) kiba leit sha Guwahati lane Shillong ha ka 5-6 tarik Nohprah la bthah ba kin kiar ban iaid na ka surok sha Tura hynrei ba kin iaid lyngba ka surok AMPT.
KI nongleit nongwan na Baghmara, SGH la bthah ba kin iaid lyngba ka surok Siju-Rongjeng. Kito kiba na WGH kiba kwah leit sha Williamnagar, Guwahati ne Shillong la bthah ba kin pyndonkam ia ka surok Asanang-Old Williamnagar.
La khang pyrshah ia ka jingpynieng kali harud surok ban leit sha ka madan tamasa khamtam na Bolbokgre-Watreigre haduh ka Lailad jong ka Jengjal, naduh ka step 5 tarik Nohprah haduh ka step 7 tarik Nohprah. La pyllait tang ia ki kali Emegency.
