Shah ai yellow card u MDC ka Mawhati
Nongpoh, Nailur 18: Ka jingïakop lehkai phutbol kaba shisngi hapdeng ka kynhun ki MLA, MDC bad Ophisar Ri Bhoi District pyrshah ïa ka kynhun ki Pastor KJP Synod Sepngi ka la long kaba shongshit haduh katta katta ha kaba la sakhi ruh ba palat hajar ngut ki paidbah ki la wan ban sakhi bad ai mynsiem ïa kane ka jingïalehkai phutbol paralok kaba la tip kum ka Charitable Friendly Football Match ba la pynlong da ka Jingïaseng Syllok ki Pastor ka KJP Synod Sepngi Ri Bhoi Zone kaba la long ha ka madan ïalehkai jong ka Umroi.
Ha kane ka jingïalehkai phutbol ba shisngi ka kynhun khleh jong ki MLA, MDC bad ophisar ki la pynliem noh ïa ka kynhun ki Pastor da 2-0 ha baroh ar kylla bad ha kane ka jingïakhun u MDC ka Mawhati Konstituensi u Bah Charles Marngar u la ïoh ïa la yellow card hadien ba u kum lymbut ïa u rangïalehkai pyrshah tad haduh ba ki paidbah ki la samrkhie bad risa beit puk bab pynshongshit ïa kane ka jingïalehkai.
La wan ban sakhilang ïa kane ka jingïalehkai da u Bah DP Wahlang, Chief Secretary ka jylla Meghalaya, ha kaba la shimbynta lang ha kane ka jingïalehkai phutbol da u Bah Mayral Born Syiem MLA ka Nongpoh, u Bah Jayson Sawkmie Mawlong, MLA ka Umsning, u Bah George B Lyngdoh MLA ka Umroi, u Bah Charles Marngar MDC ka Mawhati, u Bah R Kharbuki MDC ka Umroi nalor ki heh ophisar ka them Ri Bhoi District bad u Rev. IW Nongsiej, Moderator ka KJP Synod Sepngi u la long kum u kongsan.
Ïa kane jingïalehkai phutbol la pynlong da ka KJP Synod Sepngi kyrpang shibynta ban pynmih pisa na ka bynta ka jingrakhe ïa ka jingdap 100 snem jong ka jaka ai jingsumar ba paw ka jylla ka Dr. H Gordons Robert Hospital bad ruh na ka bynta ka jingtei ïa ka building ban pynheh shuh shuh ïa kane ka jaka sumar pang paidbah ha ka jylla.
