Shillong, Nohprah 01 : U Myntri Rangbah ka Jylla Conrad K Sangma ula ong ba 80% na ki nongshongshnong ka Jylla ki dei kiba hap hapoh ka jingkhmih ki briew kiba trei hapoh ka Tnad C&RD.
“Namar kata, phi don ia ka jingkitkhlieh kaba khraw bha bad nga kyntu ia phi ban iai bteng ha ka ban trei da ka jingkut jingmut bad jingaiti lut ha ka kam” ong u Conrad ha ka jingplie ia ka Ophis Building jong ka Directorate of Community & Rural Development (C&RD) ha Lower Lachumiere, Shillong.
Kiba iadonlang ha kane ka sngi ki kynthup ia u Myntri ka tnad C&RD Bah Sosthenes Sohtun, u Chief Secretary ka Jylla Dr Shakil P Ahammed, Principal Secretary ka tnad C&RD Sampath Kumar bad Director ka C&RD SC Sadhu.
Haba ai jingkren, u Myntri Rangbah ula ong ba ka tnad C&RD ka don ia ka bynta kaba kongsan bha ha ka jingkyntiew ia ka ioh ka kot bad ka rukom im jong ki nongshongshnong ha ki jaka nongkyndong.
“Ka Tnad C&RD kala treikam bha da ka jingkut jingmut bad jingaiti lut ha ka ban pynpoi ia ki skhim, ki project bad ki kam bha lang sha ki shnong nongkyndong, kaba wanrah ia ka jingkylla ha ka jingim jong ki briew ha ki shnong ki thaw” ula ong.
Haba ai khublei ia ka Tnad ia ka jingioh ia kane ka Office Building, u Myntri Rangbah ula ong ba watla ki jingtei/Ophis ka long kaba kongsan ban lah treikam bad shakri bha,”Ka dei u klongsnam bad ka mynsiem kaba ka jingtrei jong phi ka wanrah ia ka jingpher”.
