Shillong, Nohprah 01 : U President ka Meghalaya Pradesh Congress Committee Bah Vincent H Pala, ula kynnoh ba ka jingtyrwa ban pynkha ia ka Regional Front ha ka thain Shatei Lam Mihngi, ba kynthup ia ka NPP, TIPRA Motha bad kiwei, ka dei ka buit jong ka BJP ban phiah/pyniapait iapra ia ki kynhun ba shun BJP ha ka thain.
“Kane ka dei ka buit jong ka RSS bad ka BJP…ki kwah ban pynmih sa kawei ka shang ha kaba ia kiba shun BJP yn buh ha ka, khnang ba kin nym leit sha ka Congress lane kiwei ki party” ong u Bah Pala haba sot ia ka jingiakren hapdeng ki nongialam ka RSS bad ka BJP.
U Bah Pala ula buh jingkylli ia ka jingthmu ha kyndet ki kynhun iatreilang, haba kdew ba bun ki nong ialam ha kane ka Regional Front ki dei ki dkhot barim ka BJP lane kiba don jingiadei bad ka party. “Baroh ki dei ki paralok jong ka BJP hi…hadien ka elekshon kin sa leit ban iatreilang bad ka BJP hi..kane ka dei shispah na ka shispah ka buit jong ka BJP” ula kynnoh.
Ula kyntu ia ki paidbah ka thain Shatei Lam Mihngi ba kin long kiba husiar, haba pynpaw ba kam don satia kano kano ka jingiapher hapdeng ka Regional Front ba dang thmu ban pynkha bad ka BJP.
“Ki paidbah ki dei ban kham shalak shuh shuh ban ia kaei kaba ki thmu” ong u Bah Paul haba pynpaw ba ka kynhun iatreilang ka dei ka buit jong ka BJP ban pynskhem ialade ha ka thain.
