Shillong, Naiwieng 27 : U Myntri ka Tnad Pule Puthi Bah Lahkmen Rymbui ula pynpaw ia ka jingkyrshan ia ka jingpyrshah jong ka seng Khasi Students’ Union (KSU) ban thungkam biang ia u Vice Chancellor ka National Law University (NLU), haba kdew ia ki jingkynnoh pyndonkam bakla ia ka bor.
“Ngim dei ban pynshlur ia ka jingpynkhein ia kino kino ki rule kiba la don” ong u Bah Rymbui hadien ka jingialang bad ki Nongialam ka KSU ha ka sngi Palei.
“Nga ruh nga mynjur pura, lada ka rule ka em ba ym dei ban don ka jingpynjlan ia ka samoi treikam jong u” ula bynrap.
U Bah Rymbui ula ban jur ia ka jingdonkam ban bat ia ka jinglong hok jong u briew uba don ha ka bor, haba pynpaw “Kano kano ka jingartatien ia ka jinglong hok jong uno uno u briew, ngi (Sorkar) dei ban shim ia ki sienjam”.
U Myntri ula pynpaw ruh ia ka jingangnud jong ka Sorkar ban pynlong ia ka NLU Meghalaya kum ka University kaba hakhlieh duh, ka ban pynmih ia ki samla pule ki ban bat ia ki kyrdan kiba paw ha ka liang ki kam ain.
“Ngi don ka jingangnud ba kane ka University kan dei kawei na ki Univeristy kaba hakhlieh duh ha ka ri, ia kaba ngi kyrmen ba katto katne ki samla kiba pass na kane ka University, kin bat ia ki kyrdan kiba heh ha ki kam ain-ba kin long ki Judge ki Supreme Court lane kano kano kaba kum kata” ong u Bah Rymbui.
U Myntri ula kular ruh ba ka jingtohkit halor ki jingkynnoh kan sa iaid hadien ka rai halor ka samoi treikam jong u Vice Chancellor.
 ban thungkam biang ia u Vice Chancellor ka National Law University (NLU), haba kdew ia ki jingkynnoh pyndonkam bakla ia ka bor.){kind=link}